140 të vrarë në 181 ditë në SHBA, 28 vrasje masive në 6 muaj, më vdekjeprurësit që nga viti 2006
Nga OraNews Përditësimi i fundit 14 Korrik 2023, 13:57
Në shtetet e bashkuara të Amerikës, këtë vit është regjistruar një tjetër rekord. Fatkeqësisht jo për mirë. 140 persona kanë ndërruar jetë në 181 ditët e para të vitit, vetëm në 28 vrasje masive. Këtu nuk
Në gjashtë muajt e parë të vitit 2023, në Shtetet e Bashkuara të Amerikës u raportuan 28 vrasje masive. Në 181 ditët e para të vitit, nga 1 janari deri më 30 qershor, janë regjistruar 140 viktima nga këto vrasje masive.
Të vrarë nga duart e të huajve ose të vrarë me armë nga njerëzit e tyre të dashur, të masakruar në qytete të vogla, në qytete të mëdha, brenda shtëpive të tyre ose jashtë në mes të ditës – Gjakderdhja e këtij viti në të gjithë SHBA-në ka bërë që gjashtë muajt e parë të vitit të jenë më vdekjeprurësit të paktën që nga viti 2006.
Vrasjet masive përkufizohen si dukuritë kur katër ose më shumë persona vriten, duke mos përfshirë sulmuesin, brenda një periudhe 24-orëshe.
Një bazë e të dhënave e mbajtur nga agjencia e lajmeve Associated Press dhe USA Today në partneritet me Northeastern University gjurmon këto sulme që nga viti 2006.
Deri më tani, rekordi ishte 27 vrasje në gjashtë muajt e gjysmës së dytë të vitit 2022. James Alan Fox, profesor i kriminologjisë në Universitetin Northeastern, thotë se nuk kishte imagjinuar se do të kishte rekorde të tilla kur filloi ta mbikëqyrte bazën e të dhënave rreth pesë vjet më parë.
Edhe pse numri i vrasjeve masive është rritur gjatë viteve të fundit, pjesa e mbetur e vitit mund të jetë më e qetë, pavarësisht dhunës më të madhe gjatë fundjavës së festave të katër korrikut.
“Mund të ketë më pak vrasje më vonë gjatë vitit 2023, ose kjo mund të jetë pjesë e një trendi. Por ne nuk mund ta dimë edhe për ca kohë”, shtoi Amy Barnhorst, një psikiatre e cila është drejtoreshë e asociuar e Programit të Kërkimit për Parandalimin e Dhunës në Universitetin e Kalifornisë.
Ekspertët si Barnhorst dhe Fox ia atribuojnë numrin në rritje të vrasjeve masive rritjes së popullsisë dhe rritjet së numrit të armëve në SHBA. Këto raste më të shpeshta të dhunës kanë nxitur përpjekjet për reformim të ligjit për armët e zjarrit. Por, pavarësisht numrit rekord të vrasjeve masive, Shoqata Kombëtare e Armëve kundërshton ashpër ndryshimin e këtij ligji.
