Napoli, plumbat plagosin një familje: E mitura në gjendje të rëndë
Nga OraNews Përditësimi i fundit 24 Maj 2023, 09:08
Tre persona të plagosur, mes tyre një 10-vjeçare e cila është goditur me plumb në kokë është bilanci të shtënave me armë zjarri në një lokal në Napoli të Italisë. Familja ishte duke darkuar kur 2 persona të maskuar kanë qëlluar drejt lokalit. Policia thotë se familja nuk ishte objekt i sulmit.
Të shtëna me armë zjarri u dëgjuan në mbrëmjen e vonë të së martës në në Sant’Anastasia, në zonën napolitane të Italisë.
Dy burra të panjohur hapën zjarr në një lokal në Piazza Cattaneo, duke plagosur një burrë, gruan e tij dhe vajzën 10-vjeçare.
Të paktën 10 të shtëna u dëgjuan në drejtim të një lokali, që sipas hetimeve paraprake dyshohet që kanë qëlluar aksidentalisht familjen e cila ndodhej jashtë duke ngrënë në atë moment.
Tre të plagosurit, babai 43-vjeçar, i plagosur lehtë në dorë, nëna 35-vjeçare, e cila u plagos në bark dhe vajza 10-vjeçare, e qëlluar me plumb në kokë, ndodhen në spital.
Kjo e fundit është në gjendje të rëndë por sipas mediave italiane u shmang rreziku për jetën, pritet ti nënshtrohet operacionit.
Karabinierët po shikojnë pamjet e kamerave të sigurisë, ndërsa dëshmitarë flasin për një mosmarrëveshje mes të rinjve.
Ende nuk duhet shkaku i kësaj ngjarjeje, por hipoteza për momentin është se familja, e cila po hante jashtë lokalit, është qëlluar aksidentalisht.
