"Jo Mbreti im!" Policia arreston 52 protestues kundër monarkisë gjatë ceremonisë së kurorëzimit të mbretit Charles
Nga OraNews Përditësimi i fundit 6 Maj 2023, 20:51
Policia britanike njoftoi sot se ka kryer 52 arrestime gjatë operacionit të saj në margjina të ceremonisë së kurorëzimit të mbretit Charles.
Të arrestuarit po mbahen për një sërë veprash, të tilla si trazira, prishja e qetësisë dhe konspiracioni për të shkaktuar një shqetësim publik.
Në një deklaratë, policia e Londrës tha se të gjithë të arrestuarit mbeten në paraburgim dhe mbrojti veprimin e saj pas shumë kritikave, duke thënë se ata kishin informacione rreth planeve për të prishur ngjarjen historike.
Forcat e zbatimit të ligjit arrestuan dhjetëra ambientalistë që planifikonin aksione përgjatë rrugës së kortezhit mbretëror, si dhe të paktën gjashtë aktivistë kundër monarkisë, duke përfshirë udhëheqësin e Republikës Graham Smith, i cili kishte organizuar një demonstratë në sheshin Trafalgar.
Policia Metropolitane e Londrës, duke sqaruar se arrestoi 52 persona, të cilët mbeten në paraburgim për sjellje të parregullt, të shtunën vonë pasdite, tha se "kishte marrë informacion se protestuesit donin të prishnin procesionin mbretëror".
"Ai përfshinte informacione që tregonin se individë donin të përpiqeshin të vandalizonin monumentet me bojë, të shkelnin barrikadat dhe të prishnin trafikun zyrtar," tha Scotland Yard.
Kjo duket se aludon për llojin e veprimeve të lëvizjes mjedisore Just Stop Oil, aktivistët e së cilës u arrestuan, por policia nuk e shpjegon qartë arrestimin e protestuesve antimonarki, të cilëve iu konfiskuan pankartat "Jo mbreti im".
Megjithatë, kjo nuk i ndaloi qindra anti-monarkistë të demonstronin ndërsa procesioni mbretëror kalonte, një prani e kufizuar, por e paimagjinueshme nën mbretërimin e Elizabeth II.
Aksioni i policisë, i cili kishte vendosur më shumë se 11,000 oficerë sot, u kritikua nga grupet e të drejtave të njeriut.
Ngjarja vjen vetëm disa ditë pas miratimit të nxituar të një ligji të ri të diskutueshëm që forcon fuqitë e policisë për t'u marrë me protestat.
"Ne kemi për detyrë të ndërhyjmë kur protestat bëhen delikuente dhe rrezikojnë të shkaktojnë përçarje serioze," tha Karen Findlay, e cila koordinoi operacionin e policisë, në një deklaratë për shtyp të policisë.
"Kjo varet nga mënyra se si është formuar i gjithë mjedisi. Kurorëzimi është një ngjarje që ndodh një herë në një brez dhe është një element kyç i vlerësimit tonë," shtoi ajo.
