Pheniani paralajmëroi lëshimin e satelitit të parë ushtarak të spiunazhit, Japonia në alarm, vendos ushtrinë në gatishmëri
Nga OraNews Përditësimi i fundit 22 Prill 2023, 13:58
Japonia ka urdhëruar ushtrinë të kalojë në gjendje gatishmërie për sulme anti raketë pas kërcënimeve të Koresë së Veriut për lëshimin e një sateliti me kokë inter-kontinentale. Ministri i Mbrojtjes ka urdhëruar vendosjen e sistemeve mbrojtëse në rajonet kufitare ku edhe më parë kanë fluturuar raketat gjatë testimeve të Phenianit.
Japonia urdhëroi ushtrinë të qëndrojë në gatishmëri për kundër-sulme ndaj raketave balistike të Koresë së Veriut.
Vendimi erdhi pasi Pheniani deklaroi se është gati të lëshojë satelitin e parë ushtarak të spiunazhit.
Ky lëshim në orbitë kërkon një predhë me rreze të gjatë, që i dalohet Koresë së Veriut për shkak se Kombet e Bashkuara i shohin manovra të tilla si teste të raketave balistike.
Të shtunën ministr japonez i mbrojtjes, Yasukazu Hamada, urdhëroi Forcat e Vetëmbrojtjes të qëndronin gati pasi “ekzistonte mundësia për lëshimin e urdhërit të masave shkatërruese ndaj raketave balistike”.
Zyrtari japonez udhëzoi ushtarët që “të zbatojnë masat e nevojshme për të kufizuar dëmet në rast se ndonjë raketë balistike do të bjerë në tokë”.
Ai urdhëroi përgatitjet për dislokimin e sistemeve SM-3, për pengimin e raketave, por edhe të njësive ushtarake në Okinava, që mund të operojnë raketat Patriot PAC-3.
Udhëheqësi i Koresë së Veriut Kim Jong Un këtë javë urdhëroi agjencinë hapësinore të vendit të tij që të bënte përgatitjet përfundimtare për lëshimin e satelitit.
Kim përmendi ato që i përshkroi si kërcënime serioze të sigurisë për kombin nga "retorika më armiqësore dhe veprimet më të qarta" të SHBA-së dhe Koresë së Jugut.
Në 2012 dhe 2016, Koreja e Veriut testoi raketa balistike të cilat Pheniani i quajti lëshime satelitore. Të dy raketat fluturuan mbi rajonin Okinaëa të Japonisë.
Megjithë planet e deklaruara, Koreja e Veriut nuk ka treguar se kur synon ti lëshojë këto raketa.
Ministrat e Jashtëm të Shtatë shteteve më të industrializuara (G7) u takuan gjatë kësaj jave dhe kërkuan që Koreja e Veriut që të përmbahet nga lëshimet e mëtejshme të raketave balistike, pasi gjatë këtij viti Pheniani ka intensifikuar numrin e këtyre testimeve.
Shumë ekspertë vënë në dyshim nëse Koreja e Veriut ka kamera të sofistikuara për t'u përdorur për qëllime spiunuzhi nga një satelit, për shkak se pas lançimeve të mëparshme, janë publikuar vetëm imazhe me rezolucion të ulët.
