SHBA po hetojnë kompaninë Neuralink të Elon Musk mbi patogjenë të rrezikshëm
Nga OraNews Përditësimi i fundit 9 Shkurt 2023, 22:48
Departamenti amerikan i Transportit tha të enjten se po heton kompaninë e Elon Musk Neuralink mbi lëvizjen potencialisht të paligjshme të patogjenëve të rrezikshëm.
Një zëdhënës i Departamentit të Transportit i tha Reuters në lidhje me hetimin pasi Komiteti i Mjekësisë Përgjegjëse (PCRM), një grup mbrojtës i mirëqenies së kafshëve, i shkroi Sekretarit të Transportit Pete Buttigieg më herët të enjten për ta njoftuar atë për të dhënat që kishte marrë për këtë çështje.
PCRM tha se kishte marrë email dhe dokumente të tjera që sugjerojnë paketim të pasigurt dhe lëvizje të implanteve të hequra nga truri i majmunëve. Këto implante mund të kenë bartur sëmundje infektive në kundërshtim me ligjin federal, tha PCRM.
Zëdhënësi i Departamentit të Transportit tha se agjencia i mori akuzat e PCRM "shumë seriozisht".
"Ne jemi duke kryer një hetim për të siguruar që Neuralink është në përputhje të plotë me rregulloret federale dhe për t'i mbajtur punonjësit e tyre dhe publikun të sigurt nga patogjenët potencialisht të rrezikshëm," tha zëdhënësi.
Përfaqësuesit për Neuralink, përfshirë Musk, nuk iu përgjigjën kërkesave për komente.
Hetimi i Departamentit të Transportit i shtohet shqyrtimit me të cilin përballet Neuralink, e cila po zhvillon një implant truri që shpreson se do t'i ndihmojë njerëzit e paralizuar të ecin përsëri dhe të kurojë sëmundje të tjera neurologjike.
Në dhjetor, Reuters raportoi se Neuralink ka qenë nën një hetim federal mbi shkeljet e mundshme të mirëqenies së kafshëve dhe se disa nga stafi i saj bënë ankesa të brendshme për eksperimente të nxituara, duke shkaktuar vuajtje dhe vdekje të panevojshme.
