Salillari merr 2.2 milionë euro pa garë, për 100 ditë do të lidhë dy anijet e prodhimit të energjisë me sistemin në Shqipëri
Nga OraNews Përditësimi i fundit 26 Shtator 2022, 16:04
2.2 milionë euro është fatura që qeveria shqiptare do ti paguajë kompanisë Salillari për të lidhur dy anijet që do të prodhojnë energji në Vlorë me rrjetin e brendshëm të Shqipërisë. Fondi është parashikuar të realizohet brenda 100 ditëve, ndërsa tenderi konstatohet pa garë. Madje dhe Open Data e ka renditur me flamur të kuq.
Salillari merr një tjetër tender me vlerë të konsiderueshme nga qeveria shqiptare. Janë rreth 2.2 milionë euro që subjekti ka fituar në tenderin për ndërtimin e infrastrukturës që do të lidhë gjeneratorët e prodhimit të energjisë të vendosur në dy anijet në postin e Vlorës.
Sipas të dhënave zyrtare në garë është përfshirë vetëm kompania Salillari, që është shpallur edhe fituese e prokurimit. Madje në prokurimet publike nuk ka as vërejtje sa i përket kritereve që duket se kompania i është përgjigjur të gjitha kushteve të vendosura prej Koorporatës Elektroenergjetike.
Por tenderi është konsideruar me probleme dhe nga organizatat që monitorojnë prokurimet. Kështu Open Data i ka vendosur flamur të kuq duke sinjalizuar mungesën e konkurrimit dhe si pasojë duke ngjallur edhe dyshime.
Gjithësesi pasi të përfundojnë edhe afatet e parashikuara në ligj për ankimimet Salillari duhet që brenda 100 ditëve të shtronjë linjën për të lidhur dy anijet me sistemin e transmetimit të energjisë elektrike.
Në dokumente paraqiten dhe projektet që do të realizohen nga thellimi i bregut ku janë ankoruar anijet dhe deri në brendësi të Triportit.
Tenderi në fakt është realizuar pikërisht në kohën kur qeveria rriti me 4.4 herë çmimin e energjisë elektrike për çdo lëvizje sahati mbi 800 kilovat.
