Përgjaken rrugët/ Një viktimë dhe katër të plagosur në orët e vona të së premtes
Nga Ora News Përditësimi i fundit 24 Shtator 2022, 09:28
Një viktimë dhe 4 të plagosur është bilanci tragjik i aksidenteve rrugore të shënuara në orët e vona të së premtes në akse të ndryshme të vendit.
Rrugët e vendit vijojnë të marrin jetë njerëzish, ndërsa nuk ka asnjë përmirësim sa i përket sinjalistikave dhe ndërgjegjësimit të drejtuesve të automjeteve.
Një grua humbi jetën mbrëmjen e së premtes pasi u përplas për vdekje nga një makinë që po lëvizte në aksin Fier – Patos.
Aksidenti ndodhi në mbrëmje vonë rreth orës 23:30 të së premtes, në vendin e quajtur “Kthesa e Patosit”, ndërsa policia ende nuk ka mundur të bëjë identifikimin e viktimës edhe pse mbërriti në vendngjarje ku dhe ka mbledhur provat për zbardhjen e shkaqeve të aksidentit të rëndë.
Sipas burimeve, mësohet se një automjet që po lëvizte drejt Patosit ndërsa përplasi gruan që sipas burimeve ishte duke mbledhur kanaçe anës rrugës.
Viktima i përket komunitetit rom dhe pothuajse çdo mbrëmje shëtit rrugëve për të mbledhur kanaçe e me të ardhurat e tyre mbante familjen.
Nga informacionet e para shoferi pasi ka shkaktuar aksidentin është larguar nga vendi i ngjarjes.
Ndërkohë, pak minuta pas kësaj ngjarjeje, një tjetër aksident i rëndë automobilistik do të ndodhte në aksin rrugor Lezhë-Laç në afërsi të kryqëzimit të Shënkollit.
Dy automjete janë përplasur "kokë më kokë" me njëri-tjetrin e për pasojë kanë mbetur të plagosur 4 persona, njëri prej të cilëve në gjendje të rëndë.
