Itali/ Zbulohet ura antike romake në rrugën Tiburtina
Nga Besmira Pelushaj Përditësimi i fundit 10 Gusht 2022, 14:12
Roma na befason gjithmonë me dëshmitë e historisë së saj mijëvjeçare. Mbetjet e një ure romake kanë dalë së fundmi në dritë, gjatë gërmimeve për zgjerimin e aksit Tiburtina, në Romë.
Mbetjet e një ure romake dolën në dritë gjatë gërmimeve arkeologjike të kryera për zgjerimin e aksit Tiburtina, në kilometrin e njëmbëdhjetë të rrugës moderne që pritet të ndërtohet në Romë.
Struktura, në një analizë të parë të epokës perandorake, u përdor nga Tiburtina e lashtë për të kaluar Fosso di Pratolungo, një degë e vogël e lumit Aniene.
“Ura na tregon mbetjet e një vepre të vlefshme të inxhinierisë romake dhe do të na lejojë të kuptojmë më mirë topografinë antike të zonës dhe zhvillimet e saj ndër shekuj.
Gërmimi dhe konservimi i urës në asnjë rast nuk do të jetë pengesë për zgjerimin e vazhdueshëm të rrugës”. Për sa i përket gjendjes së punës për urën Fosso di Pratolungo, "tashmë janë identifikuar zgjidhjet e duhura për të ndërtuar urën e re pa asnjë vonesë ", siguron këshilltarja për punët publike të Kryeqytetit të Romës, Ornella Segnini.
Gërmimet, të kryera nën drejtimin e Fabrizio Santi, arkeologu i Mbikëqyrjes Speciale të Romës kanë nxjerrë në dritë pjesën kryesore të harkut të rrumbullakët të urës të ndërtuar me blloqe të fuqishme.
Harku u gjet pa pjesën qendrore: mungesa e gurthemelit i atribuohet rikonstruksionit të zonës në mesjetë dhe në rilindje, kur ura u shemb pjesërisht dhe u mbyll nga dy mure mbi tre metra të lartë.
Në përfundim të hetimeve arkeologjike, mbetjet e urës, të cilat ndodhen 4 metra nën nivelin aktual të rrugës brenda, do të mbulohen për të garantuar mbrojtjen dhe ruajtjen e tyre.
