Dhunoi turistët spanjollë, arrestohet pronari i lokalit në Himarë

Dhunimi i një familjeje turistësh spanjollë nga pronari i një lokali në Himarë është një nga episodet e rënda të këtij sezoni ku jo vetëm u cënua jeta e turistëve që zgjedhin vendin tonë por edhe imazhin e Shqipërisë në sytë e të huajve.

Mihal Kokëdhima, pronar i një lokali në Porto Palermo të Himarës, fillimisht kanosi turistët spanjollë dhe më pas ka dëmtuar automjetin e tyre dhe është konfliktuar fizikisht me ta duke u shkaktuar dëmtime në trup.

Shkak për këtë ngjarje të rëndë për turizmin shqiptar, sipas raportimeve ishte refuzimi që familja spanjolle i bëri shërbimit të keq.

Pesë turistët dhe dy shoqëruesit shqiptarë u larguan nga lokali, por sipas policisë u ndoqën dhe u dhunuan nga pronari i biznesit që i kishte ndjekur më pas. Më e dëmtuar mbeti një prej anëtarëve të familjes që kishte mbërritur me jaht në Sarandë.  

Ata morën ndihmën e parë në spital dhe më pas janë larguar nga spitali, ndërsa kanë denoncuar dhe rrëfyer të gjithë ngjarjen në polici.

Mbi bazë të këtij denoncimi dhe provave, policia e Sarandës njoftoi se ka vënë në pranga pronarin e lokalit me tre akuza “Kanosje”, “Dëmtime të tjera me dashje” dhe “Shkatërrimi i pronës”.

Grupi i turistëve spanjollë kishin mbërritur me Jaht dhe po vizitonin jugun e vendit, por pas incidentit ata nuk pranuan të prononcohen, ndërsa nuk dihet nësë vazhdojnë të qëndrojnë në brigjet e Shqipërisë.

Një ditë pas ngjarjes familjen e turistëve të huaj e takoi ministri i Turizmit Blendi Klosi u kërkoi ndjesë në emër të qeverisë shqiptare, Ai tha se ngjarje të tilla janë të papranueshme.

Blendi Klosi: "Ndjesë për ngjarjen. Besoj që ngjarje të tilla janë të pakta të mos ndodhi asnjëherë"  

Familja spanjolle u shpreh se një person i vetëm nuk përfaqëson Shqiperine.  

(Ne foto: Makina e demtuar e turisteve, dhe ambulanca qe transportoi ne spital familjen spanjolle)