Shpërthen në ajër avioni Boeing, pjesë të motorit bien mbi shtëpitë
Nga OraNews Përditësimi i fundit 22 Shkurt 2021, 10:03
Prodhuesi amerikan i avionëve, "Boeing", ka rekomanduar ndaljen e përkohshme të fluturimeve me avionët tip 777.
"Boeing" sqaroi se problemi i avionit tip 777 qendron te motori.
Në fundjavë, një aeroplan i tillë u detyrua të bëjë ulje të detyruar pasi njëri prej motorëve shpërtheu në ajër.
Megjithëse incidenti kaloi pa pasoja në njerëz, veshja e jashtme e motorit të djathtë u shpërbë gjatë fluturimit dhe pjesët e metalit u shpërndanë në zonat e banuara.
Nga hetimet paraprake mësohet se u thyen papritur dy nga fletët e helikës, duke dëmtuar tërësinë e njësisë por dëmet në trupin e avionit 26-vjeçar ishin minimale.
Mjeti ishte nisur nga qyteti Denver i Kolorados dhe kishte për destinacion ishullin e Honolulusë në Hauai.
Kompania ajrore "United Airlines" në SHBA, disa kompani në Japoni dhe në Korenë e Jugut që përdorin modelet 777 të prodhuesit amerikan, njoftuan se i kanë parkuar mjetet e ngjashme deri në hetimin e plotë të ngjarjes.
"Boeing" deklaroi se mbi 120 avionë në botë përdorin të njëjtin motor si ai që u përfshi në incidentin e fundjavës.
