Ndotja e detit në 2015, Gjykata e Durrësit dënon me burg dy shtetas grekë
Nga OraNews Përditësimi i fundit 30 Shtator 2020, 09:40
Gjykata e Durrësit ka dënuar me nga 1 vit e 6 muaj burg kapitenin dhe kryemekanikun e një trageti që 5 vjet më parë shkaktuan katastrofë mjedisore, duke derdhur 1000 litra mazut në bregdetin e Durrësit. Ata u shpallën fajtore për akuzën e ndotjes.
5 vjet pas ndotjes me përmasat e një katrastrofe mjedisore të detit Adriatik në Durrës në nëntor të vitit 2015 nga një traget, Gjykata ka pëfunduar shqyrtimin e dosjes.
Kapiteni Efthymos Sokos dhe kryemekaniku Charalampos Chiotellis janë gjetur fajtorë dhe janë dënuar me nga 1 vit e 6 muaj burg për “ndotje të ujërave” në bazë të nenit 203 të Kodit Penal Shqiptar.
Vendimi është marrë në shkurt të këtij viti nga gjyqtari Rexhep Bekteshi, sipas këtij dokumenti që Ora News disponon.
Vendimi i Gjykates se Durresit
Procesi gjyqësor u zhvillua në mungesë të dy të akuzuarve, të cilët u mbrojtën nga një avokat i caktuar nga shteti.
Burimet thonë se ata kanë nisur përgatitjet për apelimin e vendimit të Shkallës së Parë në Apel.
Sipas dosjes hetimore, dy shtetasit grekë që drejtonin anijen e kanë pranuar pakujdesinë e detarëve dhe defektet e saraçineskave, të cilat kanë çuar në derdhjen e lëndës djegëse në det.
Kjo i bëri ata me përgjegjësi dy të akuzuarit, pasi ishin në dijeni të defektit
Në atë kohë u përllogarit se rreth 1000 litra mazut u derdh nga trageti "Bridge” në detin Adriatik./A.R, OraNews
