SHERR BRENDA KAFAZIT TË GJKKO/ Tre vëllezër dhunojnë “bashkëpunëtorin në vrasjen” e Renis Dobrës
Nga Edison Vatnikaj Përditësimi i fundit 15 Qershor 2026, 11:41
Një incident i paprecedentë u shënua brenda gjykatës së Posacme. Tre vëllezërt Bushgjokaj sulmuan fizikisht Petrit Çakrin gjatë seancës për vrasjen e Renis Dobrës. Përplasja ndodhi në momentin kur Çakri po niste dëshminë e tij për krimin e vitit 2025.
Si asnjëherë më parë, një përplasje e dhunshme u shënua brenda kafazit të xhamtë në sallën e gjyqit në Gjykatën e Posaçme kundër Korrupsionit dhe Krimit të Organizuar.
Tre vëllezërit Aleksandër, Kristi dhe Fatjon Bushgjokaj dhunuan fizikisht Petrit Çakrin, sapo ky i fundit do të niste dëshminë në procesin për rrëmbimin dhe vrasjen e 23-vjeçarit Renis Dobra, krim për të cilin akuzohen të katërt.
Sipas vëllezërve Bushgjokaj, Çakri ka gënjyer në dëshmi dhe kjo ka bërë që ata të reagojnë duke e dhunuar fizikisht brenda kafazit të xhamtë ku qëndronin të katërt gjatë gjyqit.
Mësohet se ishte Kristi Bushgjoka ai që e nisi dhunën, kur është ngritur në këmbë brenda kafazit të qelqtë, duke i thënë gjykatës: “Me leje, gjyqtar?”. Menjëherë më pas i është drejtuar Petrit Çakrit, duke e sulmuar me grushte, ndërsa pas tij kanë ndërhyrë edhe dy vëllezërit e tjerë, Fatjon dhe Aleksandër Bushgjoka.
Situata e dhunës brenda sallës së Gjykatës së Posaçme kërkoi edhe ndërhyrjen e forcave të shtuara të Policisë së Shtetit, për të shmangur çdo mundësi përshkallëzimi të mëtejshëm.
Petrit Çakri, i njohur si një prej dëshmitarëve në procesin për vrasjen e deputetit demokrat Azem Hajdari, mbrëmjen e 12 shtatorit 1998, akuzohet se në bashkëpunim me tre vëllezërit Bushgjokaj ndoqi, rrëmbeu dhe vrau të riun Renis Dobra.
Krimi u shënua më 8 korrik 2025, ndërsa trupi i 23-vjeçarit u tentua të hidhej në liqenin e Ulzës brenda një makine, me synim fshehjen e krimit, por automjeti nuk përfundoi në ujë.
Sipas hetimit, rrëmbimi dhe vrasja e të riut është pasojë e konflikteve të lidhura me drogën.
