Roma zyrtarizon Tony D’Amico si drejtorin e ri sportiv!
Nga OraNews Përditësimi i fundit 13 Qershor 2026, 12:40
Roma ka zyrtarizuar emërimin e Tony D’Amico në postin e drejtorit sportiv të klubit, me detyrën që do ta marrë zyrtarisht duke nisur nga 1 korriku.
Lajmi, i përfolur prej javësh në mediat italiane, është konfirmuar nga vetë klubi verdhekuq përmes një deklarate zyrtare. D’Amico vjen në kryeqytet pas katër sezonesh të suksesshme te Atalanta, ku bashkëpunoi ngushtë me trajnerin Gian Piero Gasperini dhe kontribuoi në ndërtimin e skuadrës që fitoi Europa League në vitin 2024.
Me mbërritjen në Romë, drejtori i ri sportiv do të përballet menjëherë me disa çështje të rëndësishme, mes tyre planifikimi i merkatos së verës, përforcimi i skuadrës dhe menaxhimi i situatës financiare të klubit në raport me kërkesat e UEFA-s.
Në njoftimin e saj, Roma bëri të ditur gjithashtu se Maurizio Lombardo do të vazhdojë të mbajë përkohësisht rolin e drejtorit sportiv deri në fund të sezonit aktual.
“AS Roma ka kënaqësinë të njoftojë se Tony D’Amico do të marrë detyrën e drejtorit sportiv të klubit duke filluar nga 1 korriku. Klubi i uron Tony-t suksese në këtë aventurë të re dhe e mirëpret në familjen verdhekuqe”, thuhet në deklaratën zyrtare të klubit italian.
Emërimi i D’Amico konsiderohet një hap i rëndësishëm në projektin e ri sportiv të Romës, e cila synon të rikthehet mes protagonistëve kryesorë në futbollin italian dhe europian.
