Kosova në udhëkryq, Spahiu: Vendimi i 2014-ës mban gjallë ngërçin politik për presidentin e ri

Nga Anila Zyberaj Përditësimi i fundit 24 Prill 2026, 13:49

Vendi ndodhet në një ngërç politik për zgjedhjen e presidentit të ri, ndërsa afati kushtetues po shteron me shpejtësi. Me vetëm pesë ditë të mbetura, rreziku i zgjedhjeve të parakohshme është më real se kurrë.

Sipas analizës që profesori Nexhmedin Spahiu bëri gjatë një interviste për “Ora News”, rrënjët e krizës janë më të thella se sa përplasjet aktuale politike, duke u shtrirë në vetë kornizën ligjore të vendit dhe në një mungesë konsensusi që buron nga një shoqëri e përçarë.

Në qendër të problemit, tha Spahiu, qëndron një vendim ligjor i vitit 2014, i cili kërkon praninë e 80 deputetëve, ose dy të tretat e Kuvendit, për të zgjedhur presidentin.

Kjo dispozitë i ka dhënë opozitës një fuqi të jashtëzakonshme bllokuese, duke e bërë të domosdoshëm një konsensus të gjerë që është i vështirë për t'u arritur në peizazhin politik konfliktual të Kosovës.

Analisti Nexhmedin Spahiu thekson se gjetja e një personaliteti konsensual është një mision thuajse i pamundur, pasi si klasa politike, ashtu edhe shoqëria kosovare janë “të konfliktuara mes veti”. Sipas tij, një zgjidhje afatgjatë do të ishte ndryshimi i kushtetutës për të lejuar zgjedhjen e presidentit drejtpërdrejt nga populli, duke shmangur kështu krizat e përsëritura.

Duke analizuar shkaqet, Spahiu argumenton se fajin e kanë si palët politike, ashtu edhe vetë hapësirat ligjore.

Duke cituar filozofin Toma Akuini, ai shpjegon se ligjet duhet t'i përshtaten shoqërisë, ashtu siç i përshtaten rrobat trupit. Sipas tij, hartuesit e Kushtetutës së Kosovës e kanë “mbivlerësuar” shoqërinë, duke e imagjinuar atë më të emancipuar dhe me një “shkallë më të lartë patriotizmi” sesa është në realitet. Kjo ka çuar në krijimin e ligjeve që nuk i përshtaten realitetit, duke u bërë “të papërdorshme” dhe duke shkaktuar bllokime të vazhdueshme.

Në arenën aktuale politike, presioni është mbi kryeministrin Albin Kurti dhe Lëvizjen Vetëvendosje. Ndërsa LDK dhe PDK kanë deklaruar se nuk ka më hapësira për diskutim, Kurti përballet me një zgjedhje të vështirë.

Spahiu përshkruan stilin negociator të Kurtit si “tepër të rreptë dhe koprrac” në politikën e brendshme, një qasje që ka çuar në këtë bllokadë. Megjithatë, ai parashikon se përballë rrezikut të zgjedhjeve, të cilat nuk do t'i leverdisnin, Kurti mund të detyrohet të bëhet “më gjeneroz”.

 

Në ditët e fundit kritike, pritet që Kurti të bëjë një ofertë të re dhe më joshëse për të dalë nga kriza. Një mundësi logjike, sipas analistit, do të ishte ofrimi i postit të presidentit për opozitën.

Fati politik i Kosovës varet tashmë nga lëvizjet strategjike të ditëve në vijim, të cilat do të përcaktojnë nëse vendi do të gjejë një kompromis apo do të zhytet sërish në një cikël zgjedhor.

NDIQNI INTERVISTËN E PLOTË