FUNDI I L*FTËS/ Trump: Konflikti me Iranin mund të mbyllet brenda javësh
Nga OraNews Përditësimi i fundit 1 Prill 2026, 14:29
Presidenti amerikan deklaron se lufta me Iranin mund të përfundojë shumë shpejt, brenda disa javësh. Sinjale për negociata vijnë edhe nga Teherani, ndërsa përpjekjet ndërkombëtare për armëpushim intensifikohen. Megjithatë, tensionet në terren dhe sulmet vazhdojnë në disa zona të rajonit.
Sinjale të forta vijn për fundin e luftës në Lindjen e Mesme, ndërsa Shtetet e Bashkuara dhe Irani japin mesazhe të kujdesshme për uljen e tensioneve.
Presidenti amerikan ka deklaruar nga Shtëpia e Bardhë se operacionet ushtarake mund të përfundojnë brenda dy deri në tre javësh, duke theksuar se objektivat kryesore janë arritur dhe se Irani nuk përbën më kërcënim të menjëhershëm bërthamor.
Nga ana tjetër, edhe autoritetet iraniane kanë shprehur gatishmëri për t’i dhënë fund konfliktit, por me kusht që të ketë garanci që lufta nuk do të rifillojë.
Më parë, presidenti iranian Masoud Pezeshkian tha se Teherani kishte "vullnetin e nevojshëm" për t'i dhënë fund luftës, me kusht që armiqtë e tij të garantonin se ajo nuk do të shpërthente përsëri.
Në prapaskenë, po zhvillohen kontakte diplomatike, ndërsa fuqitë ndërkombëtare, përfshirë Kinën dhe Pakistanin, kanë propozuar një plan për armëpushim të menjëhershëm dhe rikthim të stabilitetit në rajon.
Megjithatë, pavarësisht këtyre zhvillimeve pozitive, situata në terren mbetet e brishtë. Sulmet ajrore kanë vazhduar gjatë natës në disa zona, përfshirë Iranin dhe Libanin, ndërsa incidente janë raportuar edhe në Gjirin Persik.
Ndërkohë, tensionet kanë ndikuar drejtpërdrejt në tregjet globale. Çmimet e naftës janë rritur ndjeshëm, duke reflektuar pasigurinë e krijuar nga konflikti dhe rrezikun për ndërprerje të furnizimit. Të mërkurën, çmimi i naftës Brent për dorëzimin në qershor u tregtua 1.2% më lart në 105.36 dollarë
Ekspertët vlerësojnë se nëse palët arrijnë një marrëveshje në ditët në vijim, kjo mund të shmangë një përshkallëzim më të madh dhe të stabilizojë ekonominë globale.
Për momentin, vëmendja mbetet tek zhvillimet diplomatike dhe tek deklaratat e pritshme nga liderët botërorë, të cilat mund të përcaktojnë nëse lufta është vërtet në prag të përfundimit.
