Klikime të blera për Ferma Vip? Reagon Arbana Osmani
Nga OraNews Përditësimi i fundit 29 Mars 2026, 13:48
Moderatorja Arbana Osmani ka reaguar publikisht mes debatit të ndezur për shikueshmërinë dhe klikimet në rrjet, duke dhënë një mesazh të drejtpërdrejtë që po bën xhiron e mediave sociale.
Përmes një postimi në InstaStory, ajo ka ndarë një grafik krahasues të kërkimeve në YouTube mes “Ferma VIP” dhe “Big Brother VIP Albania”, ku sipas të dhënave, formati i ri ka arritur të “thyejë” dominimin disa mujor të Big Brother në kërkime.
Por ajo që ka tërhequr më shumë vëmendje është mesazhi i saj i prerë: “PS: kërkimet nuk blihen!”, një deklaratë që shihet si një përgjigje indirekte ndaj zërave dhe akuzave për manipulim të shikueshmërisë online.
Reagimi i Arbana Osmani vjen në një moment kur diskutimet për klikime të blera dhe audience të manipuluar janë intensifikuar, sidomos mes fansave të formateve rivale.
Postimi i saj është interpretuar nga ndjekësit si një qëndrim i qartë në mbrojtje të suksesit organik të “Ferma VIP”, duke theksuar se interesi i publikut reflektohet në kërkime reale dhe jo në shifra të fryra artificialisht.
