Dermatologia Monika Fida zbulon gabimin fatal që bëni me kremin e diellit në pranverë

Nga OraNews Përditësimi i fundit 27 Mars 2026, 10:15

Me ardhjen e stinës së pranverës dhe rritjen e temperaturave, kujdesi ndaj lëkurës bëhet më i domosdoshëm se kurrë. Megjithatë, shumë njerëz bëjnë gabime thelbësore në mbrojtjen ndaj diellit, të cilat mund të çojnë në përkeqësimin e shëndetit të lëkurës.

Dermatologia Monika Fida në studion e lajmeve në “Ora Neës” sqaroi rreziqet e ekspozimit në diellin e pranverës dhe këshillat kryesore për një mbrojtje efikase.

Sipas Dr. Fida, rreziku kryesor në këtë periudhë vjen nga rritja e rrezatimit ultraviolet, i cili bëhet më i fortë. Ky ekspozim i shtuar mund të agravojë një sërë patologjish të lëkurës. Ndër më të prekurat janë sëmundje si lupusi eritematoz, fotodermatoza të ndryshme dhe melazma (njollat kafe), të cilat priren të përkeqësohen ndjeshëm gjatë kësaj stine.

Gjithashtu, personat që i nënshtrohen procedurave dermo-estetike duhet të tregojnë kujdes të veçantë, pasi ekspozimi në diell pas tyre mund të shkaktojë komplikacione dhe efekte negative.

Këshilla më e rëndësishme e dhënë nga dermatologia lidhet me një zakon të përhapur dhe të gabuar: aplikimin e kremit mbrojtës vetëm një herë në ditë. “Produkti që kemi vendosur në mëngjes duhet ndoshta riaplikuar në drekë,” thekson ajo. Kjo vlen pavarësisht faktit nëse kremi ka një faktor të lartë mbrojtjeje (SPF) 30 apo 50+.

Riaplikimi është i domosdoshëm, veçanërisht gjatë orëve të drekës, kur rrezatimi është më i fortë, dhe sidomos nëse qëndrohet në ambiente të jashtme, qoftë edhe për një kafe apo një piknik.

Përveç riaplikimit, zgjedhja e produktit të duhur, bazuar në problematikat specifike të lëkurës, është thelbësore. Për personat me patologji të caktuara si melazma apo lupusi, këshillohet jo vetëm riaplikimi i detyrueshëm i kremit mbrojtës, por edhe shmangia e plotë e ekspozimit në diell gjatë orëve të pikut.

Për të shijuar diellin e pranverës në mënyrë të sigurt, ndërgjegjësimi dhe zbatimi i këtyre rregullave është thelbësor për të ruajtur një lëkurë të shëndetshme.

NDIQNI KESHILLAT E DERMATOLOGES MONIKA FIDA