RODRI DENONCOHET PËR DRONIN! Fqinjët e mesfushorit ankohen në polici për shkelje të privatësisë

Nga Gentian Duka Përditësimi i fundit 10 Mars 2026, 14:07

Mesfushori i Manchester City, Rodri, është denoncuar në polici nga disa fqinjë të tij në zonën e Manchester. Ata pretendojnë se një dron i përdorur nga futbollisti ka fluturuar shumë pranë dritareve të banesave të tyre, duke ngritur shqetësime për cenimin e privatësisë.

Mesfushori i Manchester City, Rodri, është përfshirë në një situatë të pazakontë jashtë fushës së blertë, pasi është denoncuar në polici nga fqinjët e tij për përdorimin e një droni pranë apartamenteve të tyre.

Sipas mediave britanike, disa banorë të një ndërtese të lartë në Salford, pranë Manchester, janë ankuar se droni i futbollistit është parë duke fluturuar shumë pranë dritareve të tyre.

Ata pretendojnë se pajisja ka qëndruar vetëm disa metra larg apartamenteve, duke ngritur shqetësime për cenimin e privatësisë.

Banorët kanë deklaruar se janë ndjerë të shqetësuar pasi droni është parë duke qëndruar për disa momente pranë dritareve, ndërsa ata ndodheshin brenda shtëpive të tyre.

Një prej tyre tregoi se ai dhe partnerja e tij panë një dritë të gjelbër jashtë dritares teksa po shikonin televizor, duke kuptuar më pas se bëhej fjalë për një dron që fluturonte shumë afër apartamentit.

Pas këtyre shqetësimeve, disa prej banorëve vendosën të paraqesin një ankesë zyrtare, ndërsa rasti është raportuar edhe në policinë e Manchesterit.

Në rrjetet sociale janë publikuar pamje të Rodrit duke fluturuar dronin e tij. Fqinjët kanë thënë se hobi i tij për të fluturuar me dron ua ka pushtuar privatësinë dhe i ka lënë të frikësohen se ai ka arritur të shohë brenda pronave të tyre.

Sipas rregullave të aviacionit civil në Britaninë e Madhe, pilotët e dronëve duhet të respektojnë privatësinë e qytetarëve dhe të shmangin fluturimet shumë pranë ndërtesave apo dritareve të banesave.

Autoritetet mund të ndërhyjnë nëse ekziston dyshimi për shkelje të ligjit ose për shqetësim të banorëve.

Deri më tani, Rodri nuk ka bërë ende një reagim publik lidhur me këtë incident. Ndërkohë, policia pritet të flasë me futbollistin për të sqaruar situatën dhe për të verifikuar nëse përdorimi i dronit ka respektuar rregulloret në fuqi.