"Sherri nisi për 10 mijë lekë të vjetra" - Zbardhen dëshmitë e pronarit të servisit dhe 45-vjeçarit në Shkodër

Nga OraNews Përditësimi i fundit 6 Mars 2026, 10:38

Janë zbardhur dy dëshmitë e shtetasve të përfshirë në plagosjen e ndodhur në mbrëmjen e së enjtes, 5 mars, në Shkodër. Genc Hoxha, që mbeti i plagosur lehtë në këmbë, dhe personi tjetër Izvin Gucija, i cili dyshohet si autori i plagosjes, kanë dhënë versionet e tyre në polici lidhur me ngjarjen.

Gjithçka nisi për 10 mijë lekë të vjetra, edhe pse të dy palët kishin njohje me njëri-tjetrin. Autori i dyshuar, Gucija, ka deklaruar se 45-vjeçari Hoxha ka shkuar në servisin e tij për të riparuar grupin e timonit të automjetit.

Pronari i servisit, që është edhe autori i plagosjes sipas dëshmisë së tij, i ka thënë se nuk kishte grup timoni të ri dhe vetëm një të përdorur. Pas një bisede, nuk kanë rënë dakord dhe pronari i servisit i ka marrë 10 mijë lekë të vjetra për kontrollin që ka kryer në automjetin e 45-vjeçarit.

Sipas Gucisë, në dalje e sipër shtetasi Genc Hoxha ka krijuar një debat me të duke i thënë “përse më sheh”, si dhe duke e fyer. Pronari i servisit nuk ia ka kthyer, duke ruajtur qetësinë për shkak se ishte agjërueshëm.

Mbrëmjen e djeshme, një ditë pas debatit, Genc Hoxha dhe pronari i servisit Izvin Gucija janë takuar sërish vetëm pak metra larg servisit, në një rrugicë.

"Sherri nisi për 10 mijë lekë të vjetra" -

Po sipas autorit të dyshuar, personi tjetër e ka fyer sërish dhe ka tentuar ta godasë me sende të forta. Në ato momente, Gucija ka nxjerrë pistoletën duke e plagosur lehtë në këmbë, si vetëmbrojtje, pa pasur qëllim për ta vrarë.

Ndërsa personi i plagosur, Genc Hoxha, ka mohuar se është ai shkaktari i kësaj ngjarjeje, duke thënë se thjesht ishin duke u sqaruar dhe se pronari i servisit ka nxjerrë pistoletën duke qëlluar në drejtim të tij. 45-vjeçari mohon edhe fyerjet ndaj pronarit të servisit, duke deklaruar se ka pasur një sjellje normale.

Policia e Shkodrës ka gjetur në vendngjarje një gëzhojë që dyshohet se i përket autorit, si dhe ka sekuestruar pistoletën me të cilën ndodhi plagosja, të cilën autori e dorëzoi në momentin kur u arrestua, pak minuta pas ngjarjes, në afërsi të banesës së tij. Grupi hetimor vijon punën për zbardhjen e plotë të ngjarjes./Panorama