Mos e hapni këtë mesazh/ Paralajmërim zyrtar për përdoruesit e WhatsApp!
Nga OraNews Përditësimi i fundit 29 Dhjetor 2025, 15:08
Autoriteti Kombëtar për Sigurinë Kibernetike ka ngritur alarmin për një valë të re mashtrimesh digitale që po qarkullojnë në aplikacionin WhatsApp. Sipas njoftimit zyrtar, qytetarët po marrin mesazhe të rreme që synojnë përvetësimin e llogarive dhe përfitimin e të dhënave personale.
Mesazhet mashtruese paraqiten si njoftime zyrtare ose komunikime të besueshme, duke i ftuar përdoruesit të klikojnë në linqe të dyshimta ose të japin kode sigurie. Këto linqe i drejtojnë viktimat në faqe të rreme që imitojnë shërbime legjitime, duke rrezikuar seriozisht privatësinë dhe sigurinë e informacionit.
Për të shmangur rënien pre e këtyre skemave, AKSK u bën thirrje qytetarëve të tregojnë kujdes maksimal dhe të zbatojnë disa masa bazë sigurie: të mos hapin linqe të panjohura, të mos ndajnë kode verifikimi me persona të tretë, të kontrollojnë rregullisht pajisjet e lidhura me llogarinë WhatsApp dhe të aktivizojnë verifikimin me dy faktorë.
Autoritetet theksojnë se mbrojtja nga sulmet kibernetike kërkon vëmendje të vazhdueshme dhe bashkëpunim nga të gjithë përdoruesit. Çdo rast i dyshimtë duhet të raportohet, ndërsa për informacione shtesë qytetarët inkurajohen të ndjekin udhëzimet dhe materialet informuese të publikuara nga institucionet përgjegjëse.
