Zëvendëspresidentja: Venezuela e ka arritiur qëllimin e saj në prodhimin e naftës
Nga OraNews Përditësimi i fundit 22 Dhjetor 2025, 08:37
Venezuela ka arritur qëllimin e saj për të prodhuar 1.2 milion fuçi naftë të papërpunuar në këtë vit, pavarësisht presionit në rritje të SHBA-së dhe sekuestrimeve të tankerëve, tha zëvendëspresidentja Delcy Rodriguez.
Punëtorët në kompaninë shtetërore të naftës PDVSA arritën objektivin sipas Planit të Pavarësisë Produktive dhe po përgatiten të rrisin prodhimin dhe të përmbushin objektivat e vitit 2026, tha ajo të shtunën në Telegram.
Rodriguez e përshkroi këtë arritje si dhuratën më të mirë të Krishtlindjeve për venezuelasit, duke e quajtur atë rezultat të përpjekjeve të punëtorëve të naftës që përballen dhe mposhtin “ngacmimin, armiqësinë dhe paligjshmërinë imperialiste që sulmon dhe shkel të drejtat e njeriut të venezuelasve”.
“Asgjë dhe askush nuk do të na ndalojë”, tha ajo, duke premtuar mbështetje të vazhdueshme për Presidentin Nicolas Maduro.
Njoftimi erdhi pasi forcat amerikane sekuestruan cisterna nafte të lidhura me Venezuelën, përfshirë anijen me flamur të Panamasë Centuries të shtunën dhe Skipper më 10 dhjetor, me raportime që sugjerojnë se një sekuestrim i tretë është duke u zhvilluar.
Presidenti i SHBA-së, Donald Trump, shpalli një “bllokim total dhe të plotë” të cisternave të naftës të sanksionuara që hyjnë ose dalin nga Venezuela, duke e quajtur qeverinë e Maduros një “organizatë terroriste”.
Ndërkohë, Venezuela i ka dënuar veprimet e SHBA-së si “pirateri ndërkombëtare”.
Uashingtoni thotë se masat janë pjesë e një përpjekjeje më të gjerë për të luftuar korrupsionin dhe trafikun e drogës në rajon, ndërsa Karakasi akuzon SHBA-në se po përdor përpjekjet kundër narkotikëve si pretekst për të larguar Maduron nga pushteti dhe për të fituar kontroll mbi burimet e naftës të Venezuelës.
