Përçarja e shqiptarëve i kushton pushtetin/ VMRO-DPMNE, forca e parë në Maqedoninë e Veriut

Nga OraNews Përditësimi i fundit 3 Nëntor 2025, 14:53

Përçarja e partive shqiptare në Maqedoninë e Veriut solli humbje të ndjeshme, duke i lënë partitë maqedonase të rikthejnë kontrollin në shumicën e komunave. VMRO-DPMNE konfirmohet forcë e parë në vend, shqiptarët humbin edhe bastionet tradicionale.

Zgjedhjet lokale në Maqedoninë e Veriut, në të dyja raundet e mbajtura sollën një ndryshim të madh politik.

Përçarja e forcave shqiptare ndikoi drejtpërdrejt në rezultat, duke bërë që VMRO-DPMNE e kryeministrit Hristijan Mickoski të dalë forca e parë në vend, me një fitore të thellë në 55 komuna, përfshirë edhe kryeqytetin Shkup.

Rezultatet treguan se koalicioni shqiptar VLEN, megjithëse fitoi Tetovën, Dibrën, Bogovinën dhe Dollnenin, arriti të marrë vetëm 9 komuna në total, duke mos arritur të balancojë humbjet e Aleancës Kombëtare për Integrim, AKI-së së Ali Ahmetit, e cila mbeti me 4 komuna.

Në një garë të ashpër, përçarja mes shqiptarëve rezultoi fatale edhe në Kërçovë, një nga bastionet tradicionale shqiptare, që për herë të parë kaloi në duart e VMRO-DPMNE-së, pas dështimit të partive shqiptare për të unifikuar votën.

Në Strugë, një tjetër qytet me shumicë shqiptare, fitoi kandidati i pavarur Mendi Qyra, i mbështetur pjesërisht nga VMRO-DPMNE dhe VLEN.

Partia opozitare maqedonase LSDM u kufizua në vetëm 6 komuna, ndërsa partitë më të vogla si ZNAM, Unioni i Romëve dhe Partia Demokratike e Turqve siguruan nga një komunë secila.

TABELË:

VMRO-DPMNE: 55 komuna (përfshirë Shkupin dhe Kërçovën)

VLEN (koalicioni shqiptar): 9 komuna

AKI (Ali Ahmeti): 4 komuna

LSDM: 6 komuna

ZNAM, PDU, Unioni i Romëve: nga 1 komunë

Të pavarur: 2 komuna (përfshirë Strugën)

Pas shpalljes së rezultateve, Ali Ahmeti pranoi humbjen duke kërkuar reforma të thella dhe bashkim të forcave shqiptare, ndërsa koalicioni VLEN e cilësoi rezultatin si fundin e epokës së Ahmetit dhe fillimin e një vizioni të ri politik shqiptar.

Megjithatë, realiteti elektoral tregon se përçarja e shqiptarëve në Maqedoninë e Veriut u ka kushtuar shtrenjtë  jo vetëm komunat e vogla, por edhe bastionet historike si Kërçova dhe Struga, duke rikthyer në qendër të pushtetit VMRO-DPMNE-në.