Meghan “surprizon” Parisin/ Dukesha e Sussex rikthehet pas një dekade në skenën e modës
Nga Lili Saraçi Përditësimi i fundit 5 Tetor 2025, 13:44
Një paraqitje që surprizoi botën e modës. Dukesha e Sussex, Meghan Markle, është rikthyer në qendër të vëmendjes pasi u shfaq në Javën e Modës në Paris.
Ajo udhëtoi vetëm nga Kalifornia drejt kryeqytetit francez për të mbështetur mikun e saj të ngushtë, stilistin Pierpaolo Piccioli, tashmë drejtues kreativ i shtëpisë prestigjioze Balenciaga.
Kjo ishte paraqitja e parë e Meghan në një event mode pas më shumë se dhjetë vitesh.
E veshur me një ansambël elegant të bardhë – pantallona të gjera dhe xhaketë nga koleksioni më i ri i Balenciaga-s – ajo u shfaq me një pamje minimaliste dhe të rafinuar, të plotësuar me taka të zeza dhe flokë të lidhur në topuz.
Në publik, ajo u pa duke përshëndetur Anna Wintour, drejtoreshën e Vogue, dhe regjisorin Baz Luhrmann, në një mbrëmje ku nuk munguan yjet e modës dhe artit botëror.
Një video e postuar në Instagram e tregon Meghan teksa udhëton nëpër rrugët e Parisit, përpara se të mbërrinte në sfilatë, mes duartrokitjeve të adhuruesve.
Java e Modës në Paris do të zgjasë deri të martën, me pjesëmarrjen e shtëpive ikonike Louis Vuitton, Dior, Chanel dhe Hermès.
Kjo dalje publike shënon një rikthim të fortë për Meghan pas një periudhe të qetë në Kaliforni, ku jeton me bashkëshortin, princin Harry, dhe dy fëmijët e tyre, Archie dhe Lilibet.
Së fundmi, ajo ka lançuar një platformë të re dixhitale të stilit, përmes së cilës ndan veshjet dhe aksesorët e saj të preferuar — një hap që e rikthen fuqishëm në qendër të vëmendjes si ikonë mode dhe influencuese globale.
