Protesta të reja, të ardhshme në Berlin kundër luftës në Gaza
Nga OraNews Përditësimi i fundit 28 Shtator 2025, 15:41
Organizatorët e protestës më të madhe të zhvilluar deri më tani në Gjermani kundër luftës në Gaza thanë se do të vazhdojnë me demonstrata të tjera pas tubimit masiv në fundjavë në Berlin.
“Protesta jonë do të vazhdojë për aq kohë sa të jetë e nevojshme”, deklaroi organizatori Basem Said.
“Amnesty International” dhe “Medico International”, bashkëorganizatorë të tubimit “All Eyes on Gaza”, kërkuan sërish nga qeveria gjermane të ushtrojë më shumë presion për mbrojtjen e të drejtave të palestinezëve dhe të tërheqë mbështetjen për fushatën ushtarake të Izraelit.
Sipas policisë, rreth 60 000 persona marshuan dje në qendër të Berlinit, ndërsa organizatorët pohuan se numri i pjesëmarrësve i afrohej 100 000 vetave.
Zëdhënësja e policisë, Anja Dierschke, e përshkroi ngjarjen si “plotësisht paqësore” pavarësisht turmës së madhe. Oficerët arrestuan përkohësisht 34 persona, 20 prej të cilëve për dëmtim prone, pasi kishin pikturuar slogane në tokë para fillimit të protestës.
Në gjithë qytetin u angazhuan rreth 1 800 forca policie.
Demonstruesit kërkuan ndalimin e menjëhershëm të eksporteve gjermane të armëve drejt Izraelit, akses humanitar në Gaza dhe sanksione të BE-së ndaj Izraelit, duke akuzuar qeverinë izraelite për “gjenocid” ndaj palestinezëve.
“Qeveria federale nuk duhet të jetë më bashkëfajtore”, tha Katja Müller-Fahlbusch nga “Amnesty International” gjatë fjalës në përmbyllje të mitingut.
