FOTO/ Global Sumud Flotilla: Rezistenca në ujë që sfidon bllokadën e Gazës. Italia e Spanja dërgojnë anije të marinës ushtarake për të mbrojtur aktivistët
Nga Alba Kepi Përditësimi i fundit 25 Shtator 2025, 12:30
Një flotë ndërkombëtare prej rreth 50 anijesh, e njohur si Global Sumud Flotilla, po lundron drejt Gazës për të dërguar ndihma humanitare dhe për të tërhequr vëmendjen ndërkombëtare mbi situatën e popullsisë palestineze. Sulmet e fundit ndaj disa anijeve me flamur italian nga dronë dhe shpërthime të vogla në afërsi të Greqisë tregojnë rreziqet operative të këtij misioni. Fatmirësisht, nuk raportohet asnjë viktimë, por disa anije u dëmtuan lehtë. Për mbrojtjen e pjesëmarrësve, qeveritë Italiane dhe Spanjolle kanë nisur anije të marinës ushtarake. Reagimet diplomatike janë të ndryshme: ministri i Jashtëm italian, Tajani, kërkon nga Izraeli garanci sigurie, ndërsa kryeministrja Meloni e quan misionin “të rrezikshëm dhe të papërgjegjshëm”.
Termi arab “Sumud” (ṣumūd) do të thotë qëndrueshmëri, rezistencë dhe perseverancë. Në kontekstin palestinez, përdoret për të përshkruar qëndrimin e popullit përballë pushtimit dhe për të përballuar vështirësitë. Flotilla është një flotë anijesh që udhëtojnë së bashku për një qëllim të përbashkët. Global Sumud Flotilla bashkon iniciativa ekzistuese si Freedom Flotilla Coalition, Global Movement to Gaza, Maghreb Sumud Flotilla dhe Sumud Nusantara, duke krijuar një koalicion ndërkombëtar të mirëstrukturuar.
Historikisht, flotiljet humanitare drejt Gazës kanë pasur një trajektore të tensionuar. Nga Flotilla e Lirisë në vitin 2010 deri tek misionet e mëparshme të Maghreb dhe Nusantara, çdo përpjekje për të thyer bllokadën është shoqëruar me sfida të mëdha operative dhe tensione diplomatike me Izraelin dhe aleatët ndërkombëtarë. Ky kontekst historik i jep rëndësi veprimit aktual, duke e vendosur në një vijë të gjatë përpjekjesh civile për qasje humanitare në Gaza.
Flotilja ka tre misione parësore; dërgimin e ndihmave humanitare: ushqim, ujë, ilaçe dhe mallra të tjera jetike për banorët e Gazës. Ky është aspekti më konkret dhe i matshëm i misionit. Së dyti, sfidimi i bllokadës detare të vendosur nga Izraeli. Organizatorët synojnë të tregojnë se ndihmat mund të arrijnë në Gaza përmes detit dhe të reduktojnë efektin e izolimit. Së treti, flotilja ka një rol politik dhe mediatik, duke tërhequr vëmendjen ndërkombëtare dhe duke ushtruar presion mbi qeveritë dhe organizatat ndërkombëtare për të ndërmarrë veprime.
Flotilja përbëhet kryesisht nga anije të vogla dhe mesatare, të nisura nga porto të ndryshme mesdhetare si Barçelona, Gjenevë, Tunisi, Katania dhe Siro. Në bord ka aktivistë, gazetarë, parlamentarë, europarlamentarë, mjekë, avokatë dhe vullnetarë nga dhjetëra vende. Para nisjes, pjesëmarrësit kalojnë trajnim për sigurinë në det, menaxhimin e emergjencave, navigacionin dhe çështjet ligjore. Struktura operacionale synon të minimizojë rreziqet dhe të përgatitet për ndërhyrje të mundshme.
Osmani bisedon me Kallasin, fokusi te heqja e masave ndaj Kosovës
25 Shtator, 11:09
Anijet përballen me ndërhyrje ushtarake, mundësi bllokimi nga forcat izraelite. Incidentet e fundit me dronë dhe shpërthime tregojnë se sulmet janë një kërcënim real. Kushtet natyrore, moti i keq dhe defektet teknike në det përbëjnë sfida operative shtesë. Për më tepër, disa qeveri e konsiderojnë flotiljen si një instrument politik dhe jo thjesht humanitar, gjë që e komplikon situatën diplomatike.
Izraeli ka akuzuar flotiljen për motive politike dhe lidhje të mundshme me grupe të armatosura. Organizatorët e flotiljes, me mbështetjen e partnerëve si Freedom Flotilla Coalition, insistojnë se misioni është paqësor dhe humanitar dhe ka për qëllim të dërgojë ndihma dhe të tërheqë vëmendjen ndërkombëtare.
Global Sumud Flotilla përbën një nga misionet civile më të mëdha drejt Gazës në këtë periudhë, me një strukturë ndërkombëtare të koordinuar dhe planifikim të detajuar. Operimi i saj në det përballet me sfida operative dhe tensione diplomatike, por mbetet i orientuar drejt dërgimit të ndihmave dhe sigurimit të pjesëmarrësve. Ngjarjet e fundit tregojnë se kjo flotë nuk është thjesht një veprim simbolik, por një operacion i monitoruar ndërkombëtarisht me impakt të drejtpërdrejtë mbi shpërndarjen e ndihmave dhe presionin politik mbi palët e përfshira.
Ky mision tregon gjithashtu transformimin e veprimeve civile në instrumente ndërkombëtare, ku organizatorët përdorin procedura logjistike, të sigurisë dhe mediatike për të sfiduar kufizime dhe për të kërkuar përgjigje nga qeveritë dhe organizatat ndërkombëtare. Nga një perspektivë afatgjatë, Global Sumud Flotilla është pjesë e një tendence më të gjerë të organizatave qytetare që synojnë të ndërhyjnë në çështje humanitare dhe politike në rajone të konfliktit, duke u bërë një shembull i koordinimit ndërkombëtar paqësor.
