KOSOVA ZGJEDH/ Rreth 2.7 mln qytetarë me të drejtë vote, mbi 5600 kandidatë në garë. Detaje nga procesi
Nga OraNews Përditësimi i fundit 13 Shtator 2025, 10:47
Në Kosovë nisi këtë të shtunë zyrtarisht fushata për zgjedhjet lokale të 12 tetorit.
Gjatë fushatës zgjedhore, kandidatët për kryetarë të komunave dhe ata për kuvendet lokale do të shpalosin programet e tyre dhe do të tentojnë të bindin qytetarët që t’i votojnë.
Në zgjedhjet e 12 tetorit, të drejtë vote për zgjedhjen e kryetarëve në 38 komuna do të kenë 2 milionë e 69 mijë e 98 votues. Prej tyre, 43 mijë e 993 janë votues jashtë Kosovës.
Votuesit jashtë vendit do të mund të votojnë me postë duke nisur nga 17 shtatori. Në këto zgjedhje garojnë 5.626 kandidatë dhe prej tyre 206 janë kandidatë për kryetarë komunash dhe të tjerët për vende në kuvende komunale.
Kreu aktual i Prishtinës Përparim Rama nga radhët e LDK synon të marrë një mandat të dytë teksa do të përballet me kandidatin e Lëvizjes Vetëvendosje, Hajrulla Çeku.
Për garën zgjedhore, KQZ-ja ka certifikuar 93 subjekte politike – 32 parti, 32 iniciativa qytetare, dy koalicione dhe 27 kandidatë të pavarur. Kosova i ka mbajtur zgjedhjet e fundit lokale në tetor të vitit 2021.
Në atë kohë, Partia Demokratike e Kosovës kishte fituar më së shumti komuna, pasuar nga Lidhja Demokratike e Kosovës.
