USHQIMET PËR GJUMË TË REHATSHËM! Frutat, arrat dhe qumështi, kombinime që relaksojnë trupin e sjellin qetësi
Nga Kamela Hysa Përditësimi i fundit 27 Gusht 2025, 14:12
Një darkë e lehtë me fruta, arra ose një gotë qumësht mund të ndihmojë trupin të relaksohet dhe të përgatitet për gjumë të qetë. Kujdesuni që vakti i fundit të jetë disa orë para se të flini, për t’i dhënë trupit kohën e duhur të pushojë
Shumë prej nesh e kemi provuar ndonjëherë një gjumë të rënduar apo të parehatshëm pas një vakti të rëndë mbrëmjeje – dhe shkenca e konfirmon këtë.
Ajo që hamë para gjumit ndikon drejtpërdrejt në cilësinë e tij, ndërsa disa ushqime janë më efikase për të na ndihmuar të flemë më qetë.
Studimet tregojnë se ushqimet e pasura me triptofan dhe melatoninë, si kivi, lëngu i qershisë së thartë, vezët, peshku, qumështi dhe arrat, ndihmojnë në rregullimin e ciklit gjumë–zgjim.
Këta përbërës stimulojnë prodhimin e hormoneve që përgatisin trupin për pushim.
Megjithatë, vetëm konsumi i këtyre ushqimeve para gjumit nuk mjafton. Efikasiteti më i madh arrihet nga një dietë e ekuilibruar gjatë gjithë ditës, e pasur me fruta, perime, drithëra të plota dhe proteina të lehta.
Një element i rëndësishëm është edhe magnezi – mineral i pranishëm në spinaq, bishtajore, arra dhe drithëra – i cili ndihmon në qetësimin e sistemit nervor dhe uljen e hormonit të stresit, kortizolit.
Koha e vakteve është po aq e rëndësishme sa edhe përmbajtja e tyre.
Ekspertët rekomandojnë që vakti i fundit të konsumohet dy deri në tre orë para gjumit, pasi ngrënia e vonshme vonon prodhimin e melatoninës dhe prish ritmin natyror të trupit.
Një ndarje e qartë mes ditës dhe natës përmes vakteve të rregullta e ndihmon trurin të kuptojë se ka ardhur koha për pushim.
