KRUSHKU I TRUMP DO "JAPË" LLOGARI! Ambasador në Francë, Charles Kushner mes akuzave se Parisi nuk po lufton antisemitizmin
Nga OraNews Përditësimi i fundit 25 Gusht 2025, 14:10
Franca ka thirrur ambasadorin amerikan Charles Kushner pas akuzave se Parisi nuk po lufton mjaftueshëm antisemitizmin. Parisi i cilësoi deklaratat “të papranueshme”, ndërsa Uashingtoni mbrojti përfaqësuesin e tij. ambasadorin amerikan në Paris është njëkohësisht edhe babai i Jared Kushner, dhëndrit të Presidentit amerikan Donald Trump.
Mes Parisit dhe Uashingtonit ka pasur një përplasje diplomatike pas një letre të ambasadorit amerikan në Francë, Charles Kushner, i cili është edhe babai i Jared Kushner, dhëndrit të Presidentit amerikan Donald Trump.
Në këtë letër drejtuar Macron, Kushner akuzoi Francën se nuk po bën mjaftueshëm për të luftuar antisemitizmin, duke kritikuar edhe qëndrimin e saj për njohjen e mundshme të shtetit palestinez.
Ministria e Jashtme franceze reagoi menjëherë, duke e thirrur ambasadorin që të hënën të paraqitej në Paris.
Në një deklaratë zyrtare, Parisi i quajti akuzat e Kushnerit “të papranueshme” dhe theksoi se Franca është “plotësisht e mobilizuar” për të luftuar rritjen e akteve antisemite pas sulmit të Hamasit kundër Izraelit më 7 tetor 2023. Autoritetet franceze i konsideruan deklaratat e tij si ndërhyrje në punët e brendshme dhe në kundërshtim me parimet e partneritetit transatlantik.
Nga ana tjetër, Departamenti i Shtetit amerikan mbështeti ambasadorin, duke deklaruar se ai po përfaqëson “me sukses interesat kombëtare të SHBA-së”.
Në letrën e tij, Kushner i kërkonte Macronit të forconte zbatimin e ligjeve kundër krimeve të urrejtjes, të siguronte mbrojtjen e sinagogave dhe shkollave hebraike dhe të hiqte dorë nga çdo hap që mund të interpretohej si legjitimitet ndaj Hamasit.
Polemika vjen vetëm pak ditë pasi Macron kishte hedhur poshtë kritikat e kryeministrit izraelit, Benjamin Netanyahu, se qëndrimi i Francës për njohjen e shtetit palestinez po nxit antisemitizmin.
Tensionet ndodhin gjithashtu në një moment të ndjeshëm për marrëdhëniet franko-amerikane, të cilat kanë njohur divergjenca edhe mbi mbështetjen ndaj Ukrainës. Megjithatë, takimi miqësor i javës së kaluar mes presidentit Trump, Macron dhe liderëve të BE-së në Shtëpinë e Bardhë kishte dhënë sinjale për një afrimitet më të madh.
