Tre shqiptarët humbën jetën në aksidentin tragjik në Greqi, shoferi i kamionit që përplasi makinën e tyre lihet në paraburgim
Nga OraNews Përditësimi i fundit 22 Gusht 2025, 21:13
Shoferi 56-vjeçar i kamionit, i cili u arrestua për aksidentin tragjik në autostradën Egnatia, pranë pikës së pagesës Iasmos në Rodope, ku humbën jetën tre shqiptarë, është lënë në paraburgim.
Pasi u lirua nga spital, i akuzuari u nxor sot para autoriteteve gjyqësore, ku trupa gjykuese vendosi ta lërë në paraburgim. Shoferi 56-vjeçar i kamionit akuzohet për vrasje nga pakujdesia, lëndime trupore dhe drejtim të rrezikshëm të mjetit.
Aksidenti ndodhi afërsisht 600 metra para pikës së pagesës, kur kamioni u përplas me dy makina të ndalura që prisnin në radhë.
Nga përplasja e fuqishme, mjeti i parë shpërtheu në flakë, duke rezultuar në vdekjen e menjëhershme të tre personave, një çift të moshës 59 dhe 57 vjeç dhe një 61-vjeçar.
Rezultatet e analizave toksikologjike do të tregojnë nëse shoferi kishte konsumuar alkool, ndërsa është caktuar një ekspert i posaçëm për të përcaktuar shpejtësinë me të cilën lëvizte kamioni.
Sipas informacioneve, shoferi bullgar i mohoi akuzat dhe dha versionin e tij të rrethanave të aksidentit.
Ai dyshohet se po udhëtonte me një shpejtësi prej afërsisht 100 km/orë dhe, kur vuri re radhën e automjeteve në një distancë prej një kilometri, ngadalësoi në 70 km/orë, duke mohuar se po udhëtonte me 140 km/orë, siç thuhet në aktakuzë.
Lidhur me përplasjen, 56-vjeçari pretendoi se makina me të cilën udhëtonin tre viktimat ndërroi papritur korsi dhe hyri përpara tij, duke rezultuar në një përplasje me të dhe një zjarr.
Sipas informacioneve, autopsia e kryer nga mjeku mjeko-ligjor Nikolaos Kifnidis zbuloi se tre viktimat ishin gjallë në kohën kur shpërtheu zjarri , por kishin humbur ndjenjat për shkak të lëndimeve të rënda nga përplasja.
Vitimat kishin lëndime të rënda në kokë, gjoks dhe bark, brinjë të thyera, si dhe organe të brendshme të këputura, ndërsa shoferi u gjet gjithashtu i lënduar.
