“Bloquons tout!” - Lëvizja e re që pritet të destabilizojë Francën
Nga OraNews Përditësimi i fundit 21 Gusht 2025, 12:23
“Bloquons tout” (”Blloko gjithçka!”) më 10 shtator, quhet lëvizja e re në Francë e cila synon të paralizojë vendin. Kjo lëvizje popullore po rritet me shpejtësi në median sociale dhe më gjerë në Francë.
Qasja e saj të kujton lindjen e lëvizjes “Gilets Jaunes” (”Jelekverdhët), e cila e mbylli Francën nga viti 2018 deri në vitin 2019. Origjina e lëvizjes, e cila lindi në fillim të verës, është e paqartë.
Disa pretendojnë se ajo u themelua nga një kolektiv i quajtur “Les Essentiels” (”Thelbësorët), i cili është i afërt me qarqet sovraniste dhe teoricienë konspirativë.
Më 14 korrik (festa kombëtare franceze), ata iu referuan për herë të parë 10 shtatorit si një ditë mobilizimi, në një video në TikTok.
Thirrja u perhaps shumë shpejt nga ish-anëtarë të “jelekverdhëve” dhe më pas u ndoq nga faqe të ndryshme interneti. Pjesa më e madhe e aktivitetit po zhvillohet në internet përmes Telegram dhe Facebook.
Sot, raportojnë mediat franceze, lëvizja duket se bashkon njerëz me prirje të ndryshme politike, duke filluar nga e djathta ekstreme deri te e majta ekstreme, duke protestuar kundër shkurtimeve të buxhetit dhe propozimit të qeverisë së udhëhequr nga kryeministri François Bayrou për të shfuqizuar dy festa zyrtare.
“U bëjmë thirrje të gjithë atyre që ndajnë parimet tona dhe dëshirën tonë për të vepruar (…) që menjëherë të vendosen në shërbim të grupeve lokale që propozojnë këtë mobilizim dhe të bëjnë gjithçka që është e mundur për suksesin e tij”, shkruan udhëheqësi i “La France Insoumise”, partia e majtë ekstreme e Jean-Luc Mélenchon.
“Kërkesa kryesore është që plani Bayrou, i cili u njoftua para verës, të mos realizohet. Për të parandaluar zbatimin e këtij plani, beteja duhet të zhvillohet në të gjitha frontet”, shtoi ai.
