Belgjikë - Mbi 120 oficerë policie goditën bandën shqiptare të kanabisit, prokuroria apelon lirimin e të arrestuarve
Nga OraNews Përditësimi i fundit 20 Gusht 2025, 09:23
Policia federale gjyqësore e Belgjikës (FGP) arrestoi në qershor pesëmbëdhjetë persona në kuadër të një hetimi mbi kultivimin masiv të kanabisit, nga të cilët njëmbëdhjetë u mbajtën në paraburgim. Të martën, dhoma e këshillimit në Bruges vendosi të lirojë dy të dyshuar me kushte ose me garanci, por tani prokuroria ka vendosur të apelojë këtë vendim.
Nga Celina Cazzetta, Niewsblad
Policia federale gjyqësore kreu të mërkurën më 11 qershor plot tetëmbëdhjetë kontrolle në shtëpi në Kortrijk, Menen, Harelbeke, Waregem, Wervik, Moeskroen, Asse, Machelen, Antwerpen, Ronse, Ledeberg, Verviers, Engis dhe në Rajonin e Brukselit. Për këtë operacion në shkallë të gjerë u angazhuan mbi 120 oficerë policie dhe tre ekipe mbështetëse me qen.
Policia gjeti tri plantacione aktive kanabisi në Gent, Harelbeke dhe Verviers, që përfshinin mbi 3.200 bimë dhe fidane. Ekipet e CSI-së kryen hetime të thelluara për gjurmë.
Në Menen dhe Kortrijk u zbuluan plantacione në ndërtim e sipër. Gjatë aksionit u sekuestruan gjithashtu 4.8 kilogramë kanabis, tre automjete, armë të ndaluara dhe para cash. Një hetim financiar çoi në sekuestrimin e llogarive bankare dhe atyre në kriptomonedha.
Katërmbëdhjetë burra dhe një grua, të moshës mes 27 dhe 53 vjeç, u arrestuan. Dhjetë prej tyre janë me origjinë shqiptare. Të tjerët janë tre belgë, një kongolez dhe një rumun.
Organizata kriminale shqiptare përdorte ndërmjetës për të organizuar automjete dhe numra telefoni për prodhimin dhe tregtinë në shkallë të gjerë të kanabisit. Kjo metodë i ndihmonte drejtuesit kryesorë të qëndronin jashtë vëmendjes së autoriteteve. Plantacionet ruheshin dhe mirëmbaheshin nga persona me status qëndrimi të paligjshëm ose të pasigurt. Po ashtu, u përdorën edhe dokumente të falsifikuara.
Gjykatësi hetues vendosi arrestimin e njëmbëdhjetë të dyshuarve nën akuzën e trafikut të lëndëve narkotike brenda një organizate kriminale. Një person rezultoi të ishte i kërkuar nga drejtësia italiane dhe u burgos në pritje të ekstradimit.
Një person tjetër ishte në kërkim nga zona e policisë Bruksel Qendër/Elsene dhe iu dorëzua policisë lokale të Brukselit.
Pas seancës në dhomën e këshillimit të martën, më 17 qershor, tre të dyshuar u lanë të lirë me kushte. Ndërkohë, masa e arrestit për tetë të tjerë u zgjat.
Dhoma e këshillit në Bruges vendosi të martën në mëngjes të lirojë dy të dyshuar: një burrë që kishte dhënë me qira objektin në Harelbeke dhe një shqiptar që punonte si mbledhës në plantacionin e Verviers.
Megjithatë, pasdite, prokuroria bëri ankesë kundër kësaj vendimi.
