GAZA – 28 të vrarë dhe dhjetëra të plagosur pas sulmeve izraelite
Nga OraNews Përditësimi i fundit 10 Korrik 2025, 11:54
Të paktën 28 civilë u vranë dhe dhjetëra të tjerë u plagosën në sulmet izraelite para agimit të së enjtes në Rripin e Gazës, sipas burimeve mjekësore.
”Ushtria izraelite shënjestroi një grup civilësh që prisnin pranë një qendre kujdesi mjekësor për shpërndarjen e suplementeve ushqimore në Deir al-Balah, duke vrarë 13 prej tyre, shumica prej tyre gra dhe fëmijë, dhe duke plagosur rëndë të tjerë”, tha një burim mjekësor.
Veçmas, katër persona nga e njëjta familje u vranë në një sulm izraelit që shënjestroi shtëpinë e tyre në kampin e refugjatëve Bureij në Rripin qendror të Gazës.
Dy palestinezë u vranë gjithashtu dhe 10 u plagosën në sulmet izraelite me dronë në kampin e refugjatëve ”Nusairat”.
Në jug të Rripit të Gazës, ushtria izraelite vrau pesë persona, përfshirë dy fëmijë, dhe plagosi 20 të tjerë në sulmet ndaj tendave që strehonin palestinezët e zhvendosur në zonën Al-Mawasi, në qytetin Khan Younis.
Një nënë dhe tre nga fëmijët e saj u vranë kur ushtria izraelite goditi shtëpinë e tyre në Khan Younis. Më shumë se 20 persona u plagosën në të njëjtin sulm.
Ushtria izraelite ka vrarë gati 57 700 palestinezë, shumica prej tyre gra dhe fëmijë, në Gaza që nga tetori i vitit 2023. Bombardimet kanë shkatërruar enklavën dhe kanë çuar në mungesë ushqimi dhe përhapje sëmundjesh.
