Dortmundi rinovon një kontratë 400 milionëshe
Nga OraNews Përditësimi i fundit 1 Korrik 2025, 20:05
SHBA - Vetëm pak orë para ndeshjes kundër Monterrey në raundin e 16-tave të Kupës së Botës për Klube, Borussia Dortmund ka njoftuar rinovimin e partneritetit të tyre të gjatë me Puman.
Kompania gjermane do të vazhdojë të pajisë ekipin e Niko Kovac, siç ka bërë që nga sezoni 2012/13, me marrëveshjen e re që zgjat deri në verën e vitit 2034.
Sipas mediave lokale, klubi do të marrë 400 milionë euro gjatë nëntë viteve të ardhshme dhe do të vazhdojë të pajisë të gjitha ekipet e meshkujve, femrave dhe të të rinjve, si dhe të prodhojë kopje dhe mallra për tifozët e tij.
Duke veshur uniforma Puma, Dortmund arriti në dy finale të Ligës së Kampionëve UEFA, në 2013 dhe 2024, dhe fitoi Kupën e Gjermanisë dy herë, në 2017 dhe 2021.
“Jam shumë i kënaqur me vazhdimin e këtij partneriteti të suksesshëm dhe do të doja të falënderoja veçanërisht Matthias Baumer nga PUMA dhe drejtorin tonë ekzekutiv Carsten Cramer për këtë rezultat të shkëlqyer të negociatave për të dyja palët”, thuhet në deklaratën zyrtare të klubit.
“Partneriteti ynë me PUMA-n ka funksionuar kaq mirë sepse kemi të njëjtin mentalitet ndaj futbollit dhe vlerat tona janë shumë të ngjashme.
Ajo që kemi arritur së bashku deri më tani nuk do të kishte qenë e mundur me asnjë partner tjetër dhe jemi shumë të lumtur që do të vazhdojmë në këtë rrugë në sezonet e ardhshme”, tha Hans-Joachim Watzke, kryetar i bordit ekzekutiv të klubit.
“Me rinovimin e hershëm të partneritetit tonë afatgjatë me BVB-në, ne tregojmë se sa i rëndësishëm është klubi dhe vlerat e tij për ne.
Çdo sezon, kultura e jashtëzakonshme e tifozëve të klubit, pasioni i Murit të Verdhë legjendar dhe stili tërheqës i lojës së ekipit na frymëzojnë përsëri.
Ne mezi presim të vazhdojmë të shkruajmë historinë e futbollit gjerman së bashku”, shtoi Matthias Baumer, drejtor tregtar te Puma.
