Deputeti britanik i përgjigjet Ramës: 1 në 48 shqiptarë është në burg. Do të kërkoj që të gjithë t’ju kthehen
Nga OraNews Përditësimi i fundit 29 Qershor 2025, 18:03
Deputeti britanik Nigel Farage ka vijuar polemikat në distancë me kryeministrin Edi Rama. Në një postim të ri në Twitter, ai e etiketon Ramën duke shkruar se në Mbretërinë e Bashkuar jetojnë 53,000 qytetarë shqiptarë, nga të cilët 1,099 ndodhen në burgje.
Farage thekson se kjo do të thotë se 1 në 48 shqiptarë është i burgosur dhe premton se do t’i kërkojë Sekretarit të Brendshëm të organizojë rikthimin e të gjithë këtyre të burgosurve në Shqipëri.
“I nderuar Edi Rama. Në Mbretërinë e Bashkuar ka 53,000 shqiptarë dhe 1,099 prej tyre janë në burgjet tona. Në fakt, kjo është 1 në 48. Do t’i kërkoj Sekretarit të Brendshëm të organizojë që të gjithë këta të burgosur t’ju kthehen. Faleminderit për bashkëpunimin tuaj”, shkruhet në postim.
Kujtojmë që kryeministri Edi Rama kishte kundërshtuar deklaratat e mëparshme të deputetit britanik Nigel Farage, i cili ishte shprehur se shqiptarët në Britaninë e Madhe janë aktorë kryesorë në kriminalitet, duke pretenduar se 1 në 50 shqiptarë në territorin britanik ndodhet në burg.
Rama e sfidoi deputetin britanik për një përballje me shifra reale, duke theksuar se pretendimi i Farage është i tejfryrë. Ai u zotua se, nëse rezulton e vërtetë që “1 në 50 shqiptarë” në Britaninë e Madhe është i burgosur, atëherë do të marrë të gjithë ata në Shqipëri.
Kryeministri e sfidoi Farage-n duke thënë se, nëse deklaratat e tij nuk rezultojnë të vërteta, ai do ta mirëpriste në Shqipëri.
“Dhe gjithçka që do t’ju kërkoj në këmbim është një zotim i vogël, i thjeshtë: që herën tjetër, kur dikush të përgojojë shqiptarët, të jeni ju i pari që t’i thoni të ndalet”, shtoi Rama.
