Blegtoria në krizë, bie numri i deleve dhe dhive, Ekspertët: Subvencionet nuk mjaftojnë
Nga OraNews Përditësimi i fundit 28 Qershor 2025, 14:11
Blegtoria shqiptare po përballet me rënie të vazhdueshme, me një ulje të ndjeshme të numrit të deleve dhe dhive gjatë vitit 2024. Të dhënat zyrtare të INSTAT tregojnë se numri i deleve ka rënë me 2.5%, ndërsa ai i dhive me 3.9%. Aktualisht në vend ka 1 milion e 177 mijë dele dhe 615 mijë dhi.
Ndërkohë, ka një rritje modeste në sektorin e gjedhëve, me 9 mijë krerë lopë më shumë krahasuar me vitin e kaluar, ose 3.3% rritje.
Sipas ekspertëve, kjo rënie është pasojë e mungesës së politikave efektive dhe të qëndrueshme për mbështetjen e blegtorisë. Mjeku veterinar Xhelil Koleci paralajmëron se sektori po shkon drejt shuarjes:
“Kërkohet një strategji kombëtare, e ndërtuar mbi modelet më të mira të vendeve të zhvilluara.”
Sipas ekspertëve, subvencionet aktuale nuk janë të mjaftueshme për të motivuar fermerët të vazhdojnë mbarështimin e bagëtive. Ata theksojnë se zhvillimi rural nuk mund të shihet vetëm si çështje e ndihmës financiare, por duhet të përfshijë shërbimet bazë dhe përmirësimin e infrastrukturës.
“Fermeri ka nevojë për shërbim shëndetësor, jetë sociale dhe rrugë funksionale. Blegtoria nuk është më aktivitet tregtar, por vetëm për nevoja familjare,”, tha eksperti i bujqësisë, Noc Fasllia.
Kostoja në rritje e prodhimit dhe çmimet e larta të ushqimit për bagëtitë kanë bërë që prodhimet vendase të mos jenë më konkurruese krahasuar me ato të importuara, veçanërisht nga rajoni.
Ekspertët paralajmërojnë se varësia nga qumështi i importuar, përfshirë edhe nga Serbia, sjell pasoja të shumta ekonomike dhe sociale për vendin.
E vetmja degë e bujqësisë që ka shënuar rritje është bletaria. Numri i koshereve është rritur me 13.2% brenda një viti, duke arritur në 587 mijë familje bletësh. Megjithatë, kjo rritje nuk mjafton për të mbuluar nevojat e brendshme për mjaltë në tregun shqiptar./Top Channel
