FDA kërkon që Moderna dhe Pfizer të përditësojnë paralajmërimet për rrezikun e inflamacionit të zemrës nga vaksinat kundër COVID-19

Nga OraNews Përditësimi i fundit 28 Qershor 2025, 09:06

Administrata Amerikane e Ushqimit dhe Barnave (FDA) ka zgjeruar paralajmërimet për dy vaksinat kundër COVID-19 – ato të Moderna-s dhe Pfizer/BioNTech – duke kërkuar që të përfshihet më shumë informacion në lidhje me një efekt anësor të rrallë: miokarditin, një lloj inflamacioni i zemrës që prek kryesisht meshkujt e rinj.

Miokarditi zakonisht është i lehtë, por mund të shkaktojë shqetësime të përkohshme kardiake.

Paralajmërime për këtë efekt anësor tashmë ekzistonin në udhëzimet për përdorim të vaksinave, por sipas agjencisë Associated Press, FDA këtë pranverë u ka dërguar letra kompanive Pfizer dhe Moderna, duke kërkuar që paralajmërimet të zgjerohen dhe detajohen më tej, duke përfshirë një grup më të gjerë pacientësh.

Çfarë përmban paralajmërimi i ri?

Rreziku i miokarditit është përditësuar dhe tashmë përllogaritet në 8 raste për 1 milion persona që kanë marrë vaksinat e sezonit 2023–2024, në grupmoshën nga 6 muajsh deri në 64 vjeç.

Rreziku është më i zakonshëm tek meshkujt e moshës 12 deri në 24 vjeç, ndërsa më parë paralajmërimi përmendte vetëm grupmoshën 12–17 vjeç.

Si qëndron situata sipas CDC?

Qendrat për Kontrollin dhe Parandalimin e Sëmundjeve (CDC) kanë deklaruar më herët se nuk është vënë re ndonjë rrezik i shtuar për miokardit në bazat qeveritare të të dhënave për dëmet nga vaksinat, për periudhën që nga viti 2022 e në vazhdim.

Ky përditësim etikete nuk ndryshon miratimin e përgjithshëm të vaksinave, por tregon për një vazhdimësi të vlerësimit të efekteve anësore, veçanërisht për grupmoshat më të ndjeshme. /noa.al