Lu*ta në Gaza/ Këshilli Evropian i bën thirrje Izraelit të zbatojë plotësisht ligjin ndërkombëtar humanitar
Nga OraNews Përditësimi i fundit 26 Qershor 2025, 20:28
STRASBURG- Këshilli Evropian ka bërë thirrje për një armëpushim të menjëhershëm në Gaza dhe lirimin pa kushte të të gjithë pengjeve, duke çuar në një fund përfundimtar të armiqësive.
KE shpreh keqardhje për situatën e tmerrshme humanitare në Gaza, numrin e papranueshëm të viktimave civile dhe nivelet e urisë.
Gjithashtu i bën thirrje Izraelit të heqë plotësisht bllokadën e Gazës, të lejojë akses të menjëhershëm dhe të papenguar dhe shpërndarjen e qëndrueshme të ndihmës humanitare në shkallë të gjerë" dhe të lejojë OKB-në dhe agjencitë e saj, si dhe organizatat humanitare, "të punojnë në mënyrë të pavarur dhe të paanshme për të shpëtuar jetë".
Në përfundimet e tyre, udhëheqësit evropianë theksojnë se Izraeli duhet të përmbushë plotësisht detyrimet e tij sipas ligjit ndërkombëtar, përfshirë ligjin ndërkombëtar humanitar, dhe kujtojnë nevojën imperative për të siguruar mbrojtjen e të gjithë civilëve, përfshirë punonjësit humanitarë, në çdo kohë, si dhe infrastrukturën civile, duke përfshirë objektet mjekësore, shkollat dhe instalimet e OKB-së.
Në Bregun Perëndimor, Këshilli Evropian përsërit “dënimin e tij të fortë të përshkallëzimit”, përfshirë në Jerusalemin Lindor, pas dhunës në rritje të kolonëve, zgjerimit të vendbanimeve të paligjshme hebraike dhe operacionit ushtarak izraelit.
Këshilli Evropian fton Këshillin e Ministrave të Jashtëm të vazhdojë diskutimet në takimin e tij të ardhshëm në korrik, duke marrë parasysh zhvillimet në terren dhe raportin e Komisionit mbi pajtueshmërinë e Izraelit me Nenin 2 të Marrëveshjes së Asociimit BE-Izrael.
Sa i përket Iranit, “Këshilli Evropian mirëpret ndërprerjen e armiqësive dhe u kërkon të gjitha palëve të respektojnë ligjin ndërkombëtar, të tregojnë përmbajtje dhe të përmbahen nga marrja e masave që mund të çojnë në një përshkallëzim i ri".
Gjithashtu vëren se "BE-ja ka qenë gjithmonë e qartë se Iranit nuk duhet t'i lejohet kurrë të pajiset me armë bërthamore dhe se duhet të përmbushë detyrimet e tij ligjërisht të detyrueshme për sigurinë bërthamore sipas Traktatit të Mospërhapjes".
DËNIMI I SULMIT TERRORIST NDAJ KISHËS ORTODOKSE GREKE TË PROFETIT ELIJA NË DAMASK
Sa i përket Sirisë, "Këshilli Evropian dënon sulmin e fundit terrorist ndaj Kishës Ortodokse të Profetit Elia në Damask dhe bën thirrje që ata që janë përgjegjës të mbahen përgjegjës".
Ai gjithashtu thekson se "pavarësia, sovraniteti dhe integriteti territorial i Sirisë brenda kufijve të sigurt duhet të respektohen plotësisht, në përputhje me të drejtën ndërkombëtare".
Këshilli Evropian mirëpret heqjen e fundit të sanksioneve ekonomike kundër Sirisë, si pjesë e qasjes graduale dhe të kthyeshme të Bashkimit Evropian.
Ai kujton rëndësinë e një tranzicioni paqësor dhe gjithëpërfshirës në Siri, pa ndërhyrje të dëmshme të huaja, të mbrojtjes së të drejtave të sirianëve të të gjitha prejardhjeve etnike dhe fetare pa diskriminim, dhe të drejtësisë dhe pajtimit tranzicional.
Këshilli Evropian thekson mbështetjen e tij për sovranitetin dhe integritetin territorial të shtetit libanez dhe kujton "rolin themelor stabilizues" të Forcës së Përkohshme të Kombeve të Bashkuara në Libanin Jugor (UNIFIL).
Këshilli Evropian përsërit thirrjen e tij ndaj të gjitha palëve për të zbatuar kushtet e marrëveshjes së armëpushimit të 27 nëntorit 2024 dhe për të zbatuar Rezolutën 1701 të Këshillit të Sigurimit të OKB-së.
