Denis Villeneuve regjisori i ri i James Bond! Kush mund ta luajë "007"-ën
Nga OraNews Përditësimi i fundit 26 Qershor 2025, 13:05
Denis Villeneuve, regjisori franko-kanadez i nominuar për çmimin Oscar, do të drejtojë filmin e ardhshëm të James Bond, njoftoi ”Amazon MGM Studios”, shkruan BBC.
Regjisori i Dune tha në një deklaratë të lëshuar nga studioja se ai ishte një “fans i flaktë i James Bond” dhe synon të “nderojë traditën e këtij seriali”.
Spekulimet kanë qarkulluar mbi të ardhmen e filmave 007 pasi producentët e Bond, Barbara Broccoli dhe Michael G Wilson, për një kohë të gjatë, dhanë dorëheqjen nga rolet e tyre në muajin shkurt.
Villeneuve do të shërbejë gjithashtu si producent ekzekutiv i filmit të ri, pasi ka marrë vlerësime globale për drejtimin e serisë ”Dune”, si dhe ”Blade Runner 2049” dhe ”Arrival”.
”Amazon” nuk dha asnjë të dhënë për aktorin e ardhshëm që do të luajë James Bond në njoftim, pasi Daniel Craig u tërhoq nga roli i mishërimit më të fundit.
Çfarë do t’i sjellë Villeneuve Bond-it?
Villeneuve pranoi “përgjegjësinë e madhe” të drejtimit të filmit të ri dhe shprehu entuziazmin e tij për sfidën.
“U rrita duke parë filma të James Bond me babanë tim, që nga filmi ‘Dr No’ me Sean Connery. Jam një fans i flaktë i Bondit. Për mua, ai është një territor i shenjtë”, theksoi ai.
“Kam ndërmend ta nderoj traditën dhe të hap rrugën për shumë misione të reja që do të vijnë”, shtoi ai.
Drejtori i ”Amazon MGM Studios”, Mike Hopkins, e vlerësoi Villeneuve si një “mjeshtër kinematografie” dhe vlerësoi aftësinë e tij për të ofruar “rrëfim gjithëpërfshirës” për audiencën globale.
Regjisori është i njohur për filmat që bashkojnë pamjet madhështore dhe elegante me rrëfim kompleks të fokusuar te personazhet.
Personazhet e tij, të cilët shpesh janë vetmitarë, të izoluar emocionalisht nga të tjerët, shpesh përballen me dilema të vështira morale dhe koncepte identiteti.
Villeneuve përdor tensionin dhe emocionin për të ndërtuar sekuenca aksioni me ndikim, të cilat mund të jenë brutale dhe të shkurtra.
Kjo sugjeron që versioni i tij i Bondit ka të ngjarë të ketë shumë më tepër të përbashkëta me realizmin e ashpër që shihet në ”Casino Royale” sesa me argëtimin fantastik që disa fansa humbasin nga ditët e Roger Moore si 007.
Ajay Chowdhury, zëdhënës i Klubit Ndërkombëtar të Tifozëve të James Bond, mendon se emërimi i Villeneuve është “zhvillimi më i rëndësishëm artistik i së ardhmes” të serisë.
“Është dëshmi e peshës kulturore të serisë së filmave gati 70-vjeçar që një regjisor me peshë kaq kritike dhe komerciale dëshiron dhe është zgjedhur për të drejtuar episodin tjetër”, tha ai për BBC News.
Kush mund ta luajë Bondin?
Pyetja që shtrohet tani është, kush do ta luajë Bondin? Chowdhury dyshon se “skenari dhe vizioni” do të duhet të përfundojnë së pari përpara se të kontaktohen agjentët për “rolin më të kërkuar në kinema”.
Aktorët britanikë Aaron Taylor-Johnson dhe James Norton janë përfolur si kandidatë kryesorë për rolin, ndërsa emri i aktorit irlandez Paul Mescal është përfshirë gjithashtu në këtë listë.
Chowdhury tha se ‘’aktori i ri i Bond duhet të ketë ‘famën e Goldilocks’ … me fjalë të tjera …as shumë as shumë pak … vetëm sasinë e duhur”.
“Emra si Callum Turner, Joe Alwyn, Jack Lowden më vijnë ndërmend’’, shtoi ai.
“Kur të debutojë 007 i ri, ai do të duhet të jetë mjaftueshëm i ri për ta mbështetur në mënyrë të besueshme ekskluzivitetin në dekadën e ardhshme. Ai duhet të jetë ‘i uritur’ dhe ambicioz’’, theksoi ai.
