Asambleja e SEPCA-së në Berat, Proda: Partneriteti dhe integrimi evropian, rruga e vetme drejt sigurisë afatgjatë

Nga OraNews Përditësimi i fundit 25 Qershor 2025, 11:52

Nga qyteti i Beratit, Policia e Shtetit, në cilësinë e presidentes së SEPCA-s për vitin 2025 drejtoi punimet e Asamblesë rajonale të drejtuesve të policive të Evropës Juglindore.

Në fjalën e tij në këtë Asamble, drejtori i përgjithshëm i Policisë së Shtetit, Ilir Proda u shpreh se, “bashkëpunimi policor rajonal nuk është më thjesht një nevojë, por tashmë është thelbësor për sigurinë dhe stabilitetin në rajonin tonë dhe më gjerë”.

Proda u shpreh i bindur se do të ishte në interesin e luftës së përbashkët që edhe Policia e Kosovës të ishte anëtare e kësaj nisme rajonale.

Ai theksoi se, “SEPCA është dëshmuar në vite si një platformë strategjike bashkëpunimi mes policive të Evropës Juglindore, një urë që lidh përvojat tona, forcon koordinimin, mbështet ndërtimin e një sigurie të mëparshme”.

“Kjo Asamble është më shumë sesa një forum diskutimi, ajo është një mundësi për reflektim, për frymëzim dhe për angazhime konkrete, për të përballuar sfidat e reja të sigurisë me vendosmëri dhe vizion të përbashkët”, tha Proda.

Kreu i Policisë së Shtetit, nënvizoi se, kur krimi organizohet edhe rendi pa dyshim duhet të mirorganizohet.

Kjo, theksoi ai, “është arsyeja që Policia e Shtetit shqiptar është tërësisht e përkushtuar për të ndërtuar partneritete reale, për të forcuar shkëmbimin e shpejtë të informacionit, për të garantuar veprim të koordinuar më të gjithë partnerët tanë rajonal dhe ndërkombëtarë”.

“Fenomenet kriminale tashmë nuk njohin kufi. Krimi i organizuar, trafiku i narkotikëve, kontrabanda e emigrantëve, trafiku i qenieve njerëzore, terrorizmi, krimi financiar dhe ai kibernetik janë sfida tashmë globale dhe vetëm së bashku ne mund t’u bëjmë ballë atyre”, tha Proda, prandaj, shtoi ai, “besojmë se përgjigjja ndaj këtyre sfidave duhet të jetë gjithëpërfshirëse, e koordinuar dhe e qëndrueshme”.

Kjo, theksoi Proda, “kërkon më shumë sesa masa të zakonshme, kërkon vizion, kërkon lidership dhe mbi të gjitha besim reciprok”.

Proda deklaroi se, “Shqipëria mbetet një vend që beson në partneritetin dhe integrimin evropian si rruga e vetme drejt sigurisë afatgjatë dhe zhvillimit të qëndrueshëm”.

“Ballkani perëndimor ka mundësinë, por edhe përgjegjësinë të shndërrohet në një zonë sigurie kolektive, në një shembull konkret bashkëpunimi policor ndërkombëtar”, tha ai.

Në këtë drejtim, shtoi Proda, “Policia e Shtetit shqiptar ka përforcuar marrëveshjet dypalëshe dhe shumëpalëshe, përfshirë bashkëpunimin me Interpol, Europol, Select, si dhe përmes mekanizmave të përbashkët për kontroll kufitar dhe shkëmbim informacioni”.

Ne, nënvizoi Proda, “jemi të përqendruar në hetime proaktive kundër narkotikëve dhe kemi goditur objektiva me rrezikshmëri të lartë”.

Po ashtu, vijoi kreu i Policisë së Shtetit, “kemi rritur kapacitetin operativ dhe bashkëpunimin ndërinstitucional kundër kontrabandës së migrantëve, trafikut të qenieve njerëzore, armëve dhe pastrimit të parave”.

“Veçanërisht kemi intensifikuar hetimet financiare me qëllim goditjen e burimeve ekonomike të grupeve kriminale dhe rikuperimin e pasurive të paligjshme. Kjo është një përparësi strategjike në vizionin tonë për një sistem drejtësie më efikas dhe më të drejtë”.

“Policia e Shtetit shqiptar është në një periudhë transformimi thelbësor, si nga strukturat e teknologjia, nga profesionalizimi i burimeve njerëzore, te forcimi i marrëdhënieve me komunitetin dhe pa dyshim me partnerët tanë ndërkombëtarë”, tha Proda.

“Shqipëria mbetet një vend që beson në partneritetin dhe integrimin evropian, si rruga e vetme drejt sigurisë afatgjatë dhe zhvillimit të qëndrueshëm”, theksoi Proda.

Në kuadër të Presidencës shqiptare të SEPCA-së, Proda shprehu disa nga momentet më të rëndësishme të angazhimit të përbashkët.

“Janë zhvilluar trajnime në lidhje me hetimet financiare dhe luftën kundër trafikut të qenieve njerëzore dhe kontrabandës së migrantëve. Janë zhvilluar takime për luftën kundër krimit kibernetik, kriptovalutat, rrjetet sociale dhe platformat digjitale kriminale; takime në lidhje me promovimin e rolit të grave në polici, lidershipi dhe barazia gjinore me këto struktura. Gjithashtu, janë zhvilluar takime në lidhje me prezantimin e raportit të vlerësimit të kërcënimeve rajonale të SEPCA-s”, tha Proda.

Ai shtoi se, “këto nuk janë thjesht aktivitete, por janë hapa konkretë drejt ndërtimit të një platforme më të fortë bashkëpunimi dhe një kulturë të përbashkët sigurie”.

Duke falënderuar partnerët për bashkëpunimin, Proda u shpreh se, “në një botë pa kufi për krimin, detyra jonë është të ndërtojmë ura akoma më të forta dhe efikase komunikimi, bashkëpunimi dhe besimi me njëri-tjetrin”.

“Policia e Shtetit shqiptar do të vazhdojë të investojë në njerëzit e saj, në teknologji moderne dhe në marrëdhënie të qëndrueshme me komunitetin dhe partnerët”, tha Proda.

“Ne do të jemi dhe mbetemi një partner i besueshëm në këtë luftë, si kundër narkotikëve, terrorizmit, krimit të organizuar, korrupsionit, por edhe gjithë fenomeneve kriminale që cenojnë rajonin tonë”, theksoi ai.

“Të gjithë jemi sot këtu për të rikonfirmuar një të vërtetë të qartë, bashkëpunimi ndërkombëtar nuk është një opsion, por tashmë një domosdoshmëri, është një mision i përbashkët”, u shpreh Proda.