Vri*et aktori i njohur amerikan, arrestohet autori
Nga OraNews Përditësimi i fundit 3 Qershor 2025, 16:41
Aktori amerikan Jonathan Joss, i njohur për rolet e tij si përfaqësues i komuniteteve indigjene në ekran, është vrarë nga të shtënat me armë zjarri në San Antonio, Texas, të dielën. Policia konfirmoi se 56-vjeçari Sigfredo Alvarez Ceja është arrestuar dhe po akuzohet për vrasjen.
Sipas Departamentit të Policisë së San Antonios, Joss u gjet i shtrirë pranë rrugës dhe pavarësisht përpjekjeve për t’i dhënë ndihmë, ai u shpall i vdekur në vendngjarje nga shërbimet mjekësore emergjente. Deri më tani, autoritetet nuk kanë dhënë detaje mbi motivin e vrasjes, ndërsa njësia e hetimit të vrasjeve po vijon hetimet.
Jonathan Joss, me prejardhje nga fiset Apache dhe Comanche, kishte ndërtuar një karrierë të gjatë prej gati 30 vitesh në kinema dhe televizion. Ai u bë i njohur për publikun si zëri i John Redcorn në serialin e njohur të animuar “King of the Hill”, ndërsa mori pjesë edhe në filma dhe seriale si “True Grit”, “Walker, Texas Ranger” dhe “Friday Night Lights”.
Vdekja e tij ka sjellë tronditje në komunitetin artistik dhe atë indigjen në SHBA, ku Joss ishte një nga zërat më të dalluar për përfaqësimin e kulturës dhe identitetit indian në Hollywood.
