Igli Tare nis punën, Milani nuk ka kohë për të humbur
Nga OraNews Përditësimi i fundit 27 Maj 2025, 14:23
Dita e parë si drejtor sportiv i ri i Milanit ka qenë shumë intensive për Igli Taren. Ish-drejtuesi i Lazios ka zhvilluar takime të rëndësishme në selinë e klubit kuqezi me drejtorin sportiv të Romës, Ghisolfi dhe me menaxherin Giuseppe Riso.
Më pas, në mbrëmje, ai ka darkuar me Zlatan Ibrahimovic, administratorin Giorgio Furlani dhe skautin kryesor Geoffrey Moncada, për të planifikuar hapat e ardhshëm të klubit dhe mbi të gjitha për të vendosur trajnerin e ri të Milanit.
Pas muajsh pritjeje për zgjedhjen e drejtorit sportiv, tani Milani ka hyrë në një fazë ku koha është e çmuar dhe kërkon të mbyllë sa më shpejt çështjen e stolit. Emri që kryeson listën është ai i Vincenzo Italianos, aktualisht te Bologna, por që ende nuk ka firmosur rinovimin me klubin emilian. Megjithatë, duke qenë se rinovimi i Italianos duket afër, po rriten ndjeshëm edhe shanset për Thiago Mottën.
I larguar nga Juventusi në fund të marsit, Motta mbetet pa skuadër për momentin, por është një profil që Milani e ka ndjekur edhe verën e kaluar. Në sfond mbeten emra si Roberto Mancini, i lirë pas largimit nga kombëtarja e Arabisë Saudite, por shumë i shtrenjtë dhe i kritikuar nga tifozët; Maurizio Sarri, me të cilin Tare ka pasur përplasje në kohën kur punonin bashkë te Lazio; si dhe Francesco Farioli, një trajner premtues, por një bast që Milani nuk mund ta lejojë të humbasë në këtë moment.
Pikërisht për këto arsye, Thiago Motta duket sot kandidati më i mundshëm për të udhëhequr rilindjen e Milanit. Ditët në vijim priten zhvillime të rëndësishme, ndërsa misioni i parë i Igli Tares është gjetja e trajnerit të duhur për të nisur epokën e re kuqezi.
