Dyshime për spiunazh në Suedi, një diplomat nën hetim dhe një dorëheqje e papritur ngrenë pikëpyetje
Nga OraNews Përditësimi i fundit 14 Maj 2025, 16:04
Një diplomat i lartë suedez është vënë nën hetim nga shërbimet e sigurisë së Suedisë (Säpo) për dyshime spiunazhi, në një rast që po tërheq vëmendje të madhe publike dhe politike.
Mediat lokale raportojnë se i dyshuari, i cili ka shërbyer në disa ambasada suedeze në mbarë botën, u arrestua në zonën e Stokholmit dhe më pas u lirua, megjithëse mbetet nën hetim për një vepër penale të ndodhur midis datave 1 dhe 11 maj.
Transmetuesi kombëtar SVT njoftoi se autoritetet po shqyrtojnë një lidhje të mundshme mes këtij rasti dhe dorëheqjes së befasishme të Tobias Thyberg, i cili dha dorëheqjen vetëm një ditë pasi u emërua këshilltar i sigurisë kombëtare.
Sipas raportimeve, qeveria mori në mënyrë anonime disa foto komprometuese të Thyberg nga aplikacioni i takimeve Grindr, të cilat çuan në largimin e tij.
Pavarësisht se Thyberg nuk dyshohet për ndonjë vepër penale dhe ka një karrierë të gjatë si ambasador në Ukrainë dhe Afganistan, rrethanat e dorëheqjes së tij dhe hetimet për spiunazh kanë krijuar trysni mbi autoritetet suedeze.
Ndërkohë, radioja publike Ekot raportoi për një bastisje në banesën e një diplomati të ministrisë së jashtme.
Zëdhënësit e Säpo-s kanë refuzuar të japin detaje shtesë mbi hetimin, duke theksuar se procesi është në zhvillim.
Kjo ngjarje vjen pak muaj pasi paraardhësi i Thyberg, Henrik Landerholm, u largua nga detyra pas akuzave për trajtim të pakujdesshëm të dokumenteve të klasifikuara.
Ngjarjet e fundit kanë nxitur shqetësime serioze për sigurinë kombëtare dhe mënyrën se si trajtohen informacionet sensitive në nivelet më të larta të qeverisë suedeze.
