JO MË “VËLLEZËR NËN ARMË”! Rezervistët izraelitë kundër luftës në Gaza, Netanyahu nën presion

Nga Lili Saraçi Përditësimi i fundit 1 Maj 2025, 14:06

Rezervistë izraelitë kanë dalë publikisht kundër luftës në Gaza, duke shtuar presionin mbi kryeministrin Netanyahu mes pakënaqësive në rritje. Kritikët brenda ushtrisë paralajmërojnë për pasoja morale dhe strategjike nga vijimi i ofensivës.

Lufta në Gaza vijon, por në Izrael kundërshtimi po bëhet më i fortë! Ish-shefi i Mossad-it, Danny Yatom, është një nga zërat më të njohur kundër asaj që po ndodh në Gaza.

Ai thotë se vendimet e kryeministrit Netanyahu udhëhiqen nga interesat personale dhe jo nga siguria kombëtare

“Jam shumë i shqetësuar se vendi im do të humbasë rrugën e tij”, deklaroi Ai

Pas prishjes së armëpushimit në Mars, shumë izraelitë e humbën besimin se lufta do të çonte në lirimin e pengjeve.

Mijëra rezervistë nga të gjitha degët e ushtrisë  izraelite kanë nënshkruar letra të hapura drejtuar qeverisë së Benjamin Netanjahut, ku kërkojnë ndalim të luftës dhe kthimin e menjëhershëm të 59 pengjeve që mbahen ende nga grupi palestinez Hamas.

“Nuk dua të shërbej më. Lufta nuk ka më kuptim. Po humbasim vendin tonë.”  Thonë disa prej rezervistëve

Policia izraelite tentoi të ndalojë shfaqjen e fotove të fëmijëve nga Gaza dhe pankartave me fjalët “gjenocid” e “spastrim etnik”, por pas zemërimit publik, urdhrat u tërhoqën.

Kryeministri Netanyahu i ka quajtur protestuesit “pensionistë të zhurmshëm” dhe ka përsëritur se vetëm presioni ushtarak do të sjellë pengjet në shtëpi.

Mes betejës së armëve dhe betejës së ndërgjegjes, Izraeli ndodhet në një moment vendimtar, shkruan BBC.

Pas 7 tetorit, qindra mijëra rezervistë izraelitë iu përgjigjën thirrjes, të etur për të shërbyer.

Por tani, gjithnjë e më shumë njerëz po refuzojnë, me raportet që sugjerojnë se pjesëmarrja rezervë ka rënë në vetëm 50-60%.

Për një ushtri që varet shumë nga rezervistët për të luftuar luftërat e saj, kjo është një krizë që po afrohet në një shkallë të paparë që nga lufta e parë e Izraelit në Liban në vitin 1982.