Partia Liberale fiton zgjedhjet në Kanada, Carney mban fjalimin e parë si kryeministër: Përulësi, ambicie, unitet!
Nga OraNews Përditësimi i fundit 29 Prill 2025, 08:01
Partia Liberale e kryeministrit kanadez Mark Carney fitoi zgjedhjet parlamentare të mbajtura në vendin e Amerikës së Veriut të hënën – pas një fushate zgjedhore nën hijen e rëndë të një sërë kërcënimesh nga Presidenti i SHBA-së Donald Trump – sipas parashikimeve të medias dhe projeksioneve statistikore.
Megjithatë, numërimi i rezultateve ende paraprake nuk na lejon të themi me siguri nëse Kryeministri Carney do të kryesojë një qeveri të shumicës apo të pakicës.
Carney, i cili mori detyrën e kryeministrit pasi Justin Trudeau dha dorëheqjen në fillim të këtij viti, mundi udhëheqësin e Partisë Konservatore, Pierre Poilièvre, sipas parashikimeve të CBC dhe CTV News.
Carney është zotuar të ndjekë një qasje më të ashpër me Uashingtonin për tarifat e tij dhe ka thënë se Kanadaja do të duhet të shpenzojë miliarda për të zvogëluar varësinë e saj nga SHBA-ja.
CBC raportoi se Liberalët ende nuk i kanë siguruar 172 vendet e nevojshme për shumicën në Dhomën e Komunave, e cila ka gjithsej 343 vende. Nëse dështojnë, Carney do të detyrohet të negociojë me parti të tjera për të mbetur në pushtet. Qeveri të tilla minoritare rrallë zgjasin më shumë se dy vjet e gjysmë në Kanada.
Në fjalimin e tij të parë pas fitores, Carney dha një mesazh të fuqishëm uniteti dhe angazhimi për vendin, ndërsa iu drejtua qytetarëve me pyetjen:
“Kam një pyetje, kush është gati të mbrojë Kanadanë me mua?” — një deklaratë që vjen në një moment tensionesh të shtuara me Shtetet e Bashkuara lidhur me tarifat dhe çështje të tjera ekonomike.
Ai vijoi me një thirrje për ndërtimin e një vendi më të fortë: “Dhe kush është gati ta ndërtojë Kanadanë të fortë?” — fjalë që u pritën me brohoritje nga mbështetësit e pranishëm.
Gjatë fjalimit, Carney shprehu mirënjohjen e tij ndaj familjes, duke theksuar rolin e gruas dhe fëmijëve në jetën e tij: “Më frymëzojnë të shërbej çdo ditë.” Ai falënderoi gjithashtu kandidatët e zgjedhur, të cilët do të jenë pjesë e qeverisë së re.
Lideri i sapozgjedhur shpjegoi se vendimi për t’u përfshirë në politikë lindi nga bindja se Kanadaja kishte nevojë për “ndryshime të mëdha”, të udhëhequra nga vlerat thelbësore kanadeze — vlera që, sipas tij, i ka mësuar që në fëmijëri, në tryezën e darkës me familjen, në fushat e akullit gjatë ndeshjeve të hokejit, dhe gjatë takimeve me qytetarë në të gjithë vendin.
Ai përmendi tri vlera themelore që do të udhëheqin mandatin e tij: përulësia, ambicia dhe uniteti.
