Bisedimet indirekte mes Teheranit dhe Uashingtonit po vazhdojnë normalisht
Nga OraNews Përditësimi i fundit 17 Prill 2025, 06:55
Procesi i negociatave po ecën në një mënyrë normale dhe rutinë dhe punët e vendit nuk po zvarriten dhe nuk po shtyhen për shkak të këtyre bisedimeve, tha Presidenti iranian Masoud Pezeshkian gjatë seancës së kabinetit të mërkurën.
Negociatat po ecin në mënyrë të rregullt dhe standarde. Ndërkohë, punët e vendit po kryhen dhe po ndiqen në rrjedhën e tyre të natyrshme dhe në asnjë rrethanë – as për një sekondë – nuk shtyhen për këto çështje. Natyrisht, ne do ta mirëpresim marrëveshjen nëse arrihet”.
Presidenti shprehu gjithashtu mirënjohje për udhëzimet dhe vërejtjet e mençura të liderit të Revolucionit Islamik Ayatollah Sejjid Ali Khamenei.
Ajatollah Khamenei tha të martën se asnjë nga çështjet industriale, ekonomike, të lidhura me ndërtimin apo kulturore të Iranit nuk varen në asnjë mënyrë nga bisedimet me SHBA-në.
“Negociatat mund të japin ose jo rezultate. Ne nuk jemi as shumë optimistë dhe as shumë pesimistë për to. Natyrisht, jemi shumë skeptikë ndaj palës tjetër, por të sigurt në aftësitë tona”, tha gjatë një takimi me zyrtarë të lartë të qeverisë.
Ai gjithashtu paralajmëroi zyrtarët se punët e kombit nuk duhet të kushtëzohen me bisedimet e Omanit.
Më 12 prill, në kryeqytetin e Omanit, Muscat, u mbajtën bisedime midis përfaqësuesve amerikanë dhe iranianë mbi programin bërthamor të Teheranit. Takimi i radhës është planifikuar atje për 19 prill.
