Apeli i GJKKO-së rrëzon ankimimin e Ajola Xoxës, nuk ia kthen telefonin
Nga Edison Vatnikaj Përditësimi i fundit 15 Prill 2025, 09:46
Gjykata e Posaçme e Apelit ka rrëzuar sot kërkesën e avokatëve mbrojtës të Ajola Xoxës për heqjen e sekuestros të një telefoni.
Ai ishte sekuestruar gjatë kontrolleve për llogari të hetimeve ndaj saj dhe bashkëshortit të saj Erion Veliaj që është i arrestuar.
Me këtë vendim, Apeli lë në fuqi masën e dhënë më herët nga shkalla e parë, duke i dhënë të drejtë kërkesës së prokurorisë për të sekuestruar pajisjen si pjesë e hetimeve në vijim.
Kujtojmë se një ditë më parë Prokuroria e Posaçme urdhëroi sërish kontrolle te "Kodra e Diellit", në kuadër të hetimeve që po kryhen ndaj kryebashkiakut të Tiranës Erion Veliaj, gruas së tij dhe gjashtë biznesmenëve.
Kontrollet u raportuan se u krye në një apartament një kat sipër hyrjes së kryebashkiakut.
Ka dyshime se apartamenti ku në letra rezulton të përdoret me qira nga një çift, të jetë në përdorim nga Veliaj dhe bashkëshortja e tij, Ajola Xoxa.
Veliaj dhe Xoxa po hetohen nën dyshimet për korrupsion e pastrim parash.
Po ashtu, kujtojmë se Ajola Xoxa është nën hetim për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë), “Pastrimi i produkteve të veprës penale ose veprimtarisë kriminale”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, parashikuar nga neni 260 e 25, 287/2 dhe 257/a/2 i Kodit Penal.
REVOKIMI I MASES
Ndërkaq gazetari Edison Vatnikaj raportoi dje se kryebashkiaku i Tiranës Erion Veliaj, i cili prej më shumë se dy muajsh mbahet në masën e sigurisë “arrest në burg” nën dyshimin se ka kryer dy vepra penale, kërkon të lirohet nga qelia.
Veliaj ka kërkuar revokim ose zëvendësim të masës së sigurisë, si dhe informacion dy mujor nga Prokuroria e Posaçme Antikorrupsion lidhur me hetimet që po kryhen ndaj tij sa i përket veprës penale të korrupsionit dhe pastrimit të parave.
Kërkesa e tij do shqyrtohet të mërkurën më datë 16 prill nga gjyqtari i hetimit paraprak Erjon Bani, i cili firmosi masën “arrest në burg” ndaj Veliajt.
Kryebashkiaku i Tiranës më herët apeloi masën e GJKKO-së në Apelin e Posaçëm, por shkalla e dytë e gjyqëorit vendosi të rrëzojë kërkesën e tij duke lënë në fuqi vendimin e dhënë nga Erjon Bani në seancën e vlerësimit të masave të sigurisë që u mbajt në Gjykatën e Posaçme në 12 shkurt.
Vendimi i Apelit u zbardh pak ditë më parë, teksa pritet që mbrojtja ligjore e Erion Veliajt të bëjë rekurs në Gjykatën e Lartë, pasi ata kundërshtojnë masën shtrënguese, por edhe hetimin e nisur nga SPAK, që sipas tyre bazohet mbi një kallëzim anonim.
Për të njëjtën çështje, biznesmeni Elman Abule qëndron në masën “arrest në shtëpi”, ndërsa bashkëshortja e Veliajt si dhe pesë biznesmenë të tjerë mes tyre Gentian Sula, Shkëlqim Fusha, Meriman Palushi, Fatmir Bektashi dhe Sokol Kryeziu janë kufizuar me masën “detyrim paraqitje”.
