Estonia ndalon cisternën e lidhur me Rusinë: Pjesë e “flotës hije” që shmang sanksionet
Nga OraNews Përditësimi i fundit 11 Prill 2025, 17:54
Autoritetet estoneze ndaluan një cisternë nafte të lidhur me Kremlinin pranë Talinit, për shkelje të ligjit detar, në një veprim që shënon herën e parë që vendi godet drejtpërdrejt të ashtuquajturën “flotë hije” të Rusisë.
Anija “Kiwala”, e cila ishte nisur drejt portit rus të Ust-Luga, po lundronte pa flamur, pavarësisht se ekuipazhi paraqiti dokumente për flamurin e Xhibutit – një pretendim që u hodh poshtë nga autoritetet e atij shteti.
Sipas Zëvendës Drejtorit të Përgjithshëm të Policisë dhe Rojeve Kufitare të Estonisë, Veiko Kommusaar, Estonia ushtroi të drejtën për të ndaluar anijen për inspektim, pasi operimi pa flamur përbën shkelje të ligjit ndërkombëtar detar.
“Kiwala” është subjekt sanksionesh nga BE, Britania e Madhe, Zvicra dhe Kanadaja, dhe dyshohet se përdoret për të transportuar fshehurazi naftë ruse, në përpjekje për të anashkaluar embargon ndërkombëtare.
Anija ndodhet aktualisht nën mbikëqyrje të ngushtë nga tre anije të marinës estoneze, ndërsa zhvillohen kontrolle të mëtejshme.
Kommusaar shtoi se gjatë vitit të fundit është vënë re rritje e ndjeshme e anijeve që lundrojnë në Gjirin e Finlandës pa dokumentacion të rregullt, si pjesë e një operacioni më të gjerë të Moskës për të anashkaluar sanksionet.
Kiwala është në pronësi të kompanisë Tirad Shipping, e regjistruar në Mauritius, e cila operon vetëm këtë anije.
