Ushtria izraelite lëshon urdhra evakuimi në jug të Gazës, Rafah

Nga OraNews Përditësimi i fundit 31 Mars 2025, 17:32

Ushtria izraelite lëshoi ​​të hënën urdhra gjithëpërfshirës evakuimi që mbulojnë Rafah dhe zonat përreth, duke treguar se së shpejti mund të nisë një tjetër operacion të madh tokësor në qytetin më jugor të Rripit të Gazës.

Izraeli i dha fund armëpushimit me grupin militant Hamas dhe rinovoi luftën e tij ajrore dhe tokësore në fillim të këtij muaji.

Në fillim të marsit, ai ndërpreu të gjitha furnizimet me ushqim, karburant, ilaçe dhe ndihma humanitare për rreth 2 milionë palestinezë të territorit për t'i bërë presion Hamasit që të pranojë ndryshimet e propozuara në marrëveshjen e armëpushimit.

Ushtria izraelite urdhëroi palestinezët të shkonin në Muwasi, një shtrirje e kampeve të mjera tendash përgjatë bregut. Urdhrat erdhën gjatë Fitër BAjramit, një festë myslimane që shënon fundin e muajit të agjërimit të Ramazanit.

Majin e kaluar, Izraeli nisi një operacion të madh në Rafah, në kufirin me Egjiptin, duke lënë pjesë të mëdha në gërmadha. Ushtria kapi një corridor strategjik përgjatë kufirit si dhe kalimin Rafah me Egjiptin, e vetmja portë e Gazës për në botën e jashtme që nuk kontrollohej nga Izraeli.

Izraeli duhej të tërhiqej nga korridori sipas armëpushimit që nënshkroi me Hamasin në janar nën presionin e SHBA-së, por më vonë refuzoi ta bënte këtë, duke përmendur nevojën për të parandaluar kontrabandën e armëve.

Mjekët e vrarë nga zjarri izraelit janë varrosur

Dhjetra u mblodhën në një funeral për disa nga 15 reaguesit e urgjencës të vrarë nga zjarri izraelit, gjatë një operacioni tokësor në Rafah javën e kaluar.

Federata Ndërkombëtare e Shoqatave të Kryqit të Kuq dhe Gjysmëhënës së Kuqe e quajti atë, sulmin më vdekjeprurës ndaj mjekëve të saj në disa vite.

Raed al-Nems, një zëdhënës i Gjysmëhënës së Kuqe Palestineze, tha se ndihmësit u "vranë me gjakftohtësi", pavarësisht se mbanin uniforma dhe vepronin në ambulanca të etiketuara qartë.

Në lutjet e varrimit, qefinët e tyre ishin të veshur me pankarta të Gjysmëhënës së Kuqe.

Ushtria izraelite ka thënë se forcat e saj hapën zjarr ndaj disa automjeteve që ngjallën dyshime, duke përparuar pa fenerë apo sinjale emergjence. Ushtria tha se një operativ i Hamasit dhe tetë militantë të tjerë ishin në mesin e të vrarëve.

Zyra humanitare e Kombeve të Bashkuara tha se të vdekurit përfshinin tetë punëtorë të Gjysmëhënës së Kuqe, gjashtë anëtarë të Mbrojtjes Civile të Gazës, e cila vepron nën qeverinë e drejtuar nga Hamasi, dhe një punonjës të OKB-së.

Ekipet e shpëtimit u lejuan të hynin në zonë vetëm një javë më vonë për të gjetur trupat. Pamjet e operacionit të rikuperimit të së dielës të publikuara nga OKB-ja, treguan punonjësit e Mbrojtjes Civile duke gërmuar në një grumbull rëre dhe duke nxjerrë një trup të veshur me të njëjtin jelek portokalli si të tyren.