Bisedimet për koalicionin në Gjermani hasin pengesa teksa mbështetja për AfD-në arrin nivelin më të lartë historik

Nga OraNews Përditësimi i fundit 27 Mars 2025, 16:46

Partitë që synojnë të formojnë qeverinë e ardhshme gjermane po hasin vështirësi për të arritur një marrëveshje mbi çështje thelbësore për votuesit, si migracioni, taksat dhe çështjet gjinore.

Negociatat nxjerrin në pah hendekun mes asaj që aleanca qendrore e djathtë CDU/CSU u premtoi votuesve dhe politikave të majta që do të duhet të zbatojnë për të kënaqur partnerët e mundshëm të koalicionit, socialdemokratët (SPD).

Raundi i parë zyrtar i bisedimeve për koalicionin përfundoi të hënën, më 24 mars, dhe sipas raporteve mediatike, ka ende shumë mospërputhje në çështje kyçe të politikave.

Një nga çështjet më të debatuara është migracioni.

Gjatë fushatës zgjedhore, lideri i CDU-së, Friedrich Merz, premtoi të ndalonte emigrantët e paligjshëm në kufi, por më pas u tërhoq nga ky qëndrim, pasi e kuptoi se duhet të lëshonte terren ndaj kërkesave të SPD-së për të formuar qeverinë.

Siç është raportuar më parë, SPD-ja dëshiron të ndjekë një qasje të kundërt me CDU-në: të pranojë 500,000 emigrantë në vit, t'u japë të drejtën e votës të huajve që jetojnë në Gjermani dhe të sigurohet që deportimet të jenë vetëm "opsioni i fundit".

Socialdemokratët gjithashtu refuzojnë propozimet e CDU/CSU për të ulur përfitimet për azilkërkuesit, duke e quajtur këtë masë çnjerëzore.

Ndërsa CDU/CSU synon uljen e taksave, partnerët e tyre të majtë kërkojnë rritjen e tyre.

Po ashtu, ekziston një mosmarrëveshje mbi të ashtuquajturin ligj të vetëpërcaktimit, një akt ligjor i miratuar vitin e kaluar që lejon çdo individ të ndryshojë ligjërisht emrin dhe gjininë e tij thjesht me një aplikim.

CDU/CSU dëshiron ta shfuqizojë këtë ligj, por SPD-ja kërkon ta mbajë në fuqi.

Palët negociuese kanë lavdëruar njëra-tjetrën publikisht, por pas skenave situata nuk është aq e qetë.

Merz-i dhe CDU-ja e tij tashmë po përballen me zemërimin e votuesve për shkak të shkeljes së premtimeve elektorale në këmbim të pushtetit.

Një sondazh i publikuar nga ZDF javën e kaluar tregoi se 73% e të anketuarve ndiheshin të mashtruar nga Merz, përfshirë 44% të mbështetësve të vetë CDU/CSU-së.

Votuesit konservatorë janë të pakënaqur jo vetëm me ndryshimin e qëndrimit të Merz-it për migracionin, por edhe me planin e tij për të marrë një borxh masiv prej 1 trilion euro për të forcuar mbrojtjen dhe infrastrukturën e vendit, pavarësisht se kishte premtuar se nuk do të reformonte rregullat për kufizimin e borxhit, të njohura si "freni i borxhit".

Merz ka bërë gjithashtu lëshime ndaj të Gjelbërve, duke rënë dakord të ndajë 100 milionë euro për fondin e klimës dhe të përfshijë në kushtetutë objektivin për neutralitetin klimatik deri në vitin 2045.

Një sondazh i ri tregon se mbështetja për CDU/CSU ka rënë në 27%, nga 28.5% që morën në zgjedhjet e muajit të kaluar. Popullariteti i SPD-së ka rënë gjithashtu me 2 pikë përqindjeje, duke arritur në 14.5%.

Ndërkohë, partia e djathtë Alternative für Deutschland (AfD), e cila ka kritikuar ashpër Merz-it për "orgjinë e borxhit", ka parë një rritje të mbështetjes nga 20.8% në një nivel rekord prej 23.5%.

AfD ka marrë pjesën më të madhe të vendeve të saj në histori, 152 deputetë, në parlamentin e ri gjerman me 630 vende, i cili zhvilloi seancën e tij të parë të martën, më 25 mars.

Në fjalimin e tij, lideri i grupit parlamentar të AfD-së, Stephan Brandner, deklaroi se partia e tij do të ofrojë një "alternativë të fortë" ndaj partive tradicionale, të cilat ai i cilësoi si përfaqësuese të një "Gjermanie të vjetër dhe të shkatërruar".