Udhëheqësi i opozitës izraelite bën thirrje për mbylljen e ekonomisë, duke nxitur zgjedhje të parakohshme

Nga OraNews Përditësimi i fundit 24 Mars 2025, 16:13

Udhëheqësi i opozitës izraelite Yair Golan bëri thirrje të hënën për mbylljen e ekonomisë dhe shërbimeve në Izrael, për të shtyrë qeverinë e Benjamin Netanyahu të shkojë në zgjedhje të parakohshme.

"Ne duhet të kalojmë nga protesta në rezistencë, kjo qeveri është një qeveri shkatërrimi," tha Golan, i cili drejton Partinë Demokratike, për radion lokale FM 103.

Ai tha se i ftoi të gjithë liderët e opozitës, veçanërisht liderët e partive liberale dhe demokratike, të krijojnë një dhomë të përbashkët për të koordinuar hapat e tyre kundër qeverisë Netanyahu.

Benny Gantz, lideri i Partisë centriste të Unitetit Kombëtar, paralajmëroi në X se "minimi i institucionit të shtetit nga Netanyahu, do të përfundojë në një katastrofë".

Netanyahu ka refuzuar të marrë përgjegjësinë për dështimet që çuan në sulmin e Hamasit më 7 tetor 2023, dhe hodhi poshtë thirrjet e opozitës për mbajtjen e zgjedhjeve të parakohshme.

Mijëra izraelitë dolën në rrugë ditët e fundit për të protestuar kundër vendimit të qeverisë për të shkarkuar Ronen Bar, kreun e agjencisë së sigurisë së brendshme Shin Bet dhe Prokurorin e Përgjithshëm Gali Baharav-Miara.

Gjykata e Lartë e Izraelit do të shqyrtojë peticionet, që kundërshtojnë shkarkimin e shefit të Shin Bet më 8 prill.

Bar la të kuptohet për "motive politike" pas shkarkimit të tij, duke sugjeruar se vendimi i Netanyahu rrjedh nga refuzimi i tij për të treguar "besnikëri personale" ndaj kryeministrit.

Ushtria izraelite ka nisur një fushatë të befasishme ajrore në Gaza që nga 18 marsi, duke vrarë më shumë se 700 palestinezë, duke plagosur mbi 1000 të tjerë dhe duke shkatërruar një marrëveshje armëpushimi dhe shkëmbimi të të burgosurve që u arrit në janar.

Gati 50,000 palestinezë janë vrarë, kryesisht gra dhe fëmijë, dhe më shumë se 112,000 janë plagosur në një sulm brutal ushtarak izraelit në Gaza që nga tetori i vitit 2023.

Gjykata Ndërkombëtare Penale lëshoi ​​urdhra arresti nëntorin e kaluar për Netanyahun dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një çështje gjenocidi në Gjykatën Ndërkombëtare të Drejtësisë për luftën e tij në enklavë.